"İran prezidentinin ölümünün əsas səbəbi pis hava şəraitinə söykənən helikopter qəzasıdır. Bu, hadisədən dərhal sonra İranın rəsmi dairələrinin verdikləri rəsmi açıqlamadır. Ona görə də, düşünürəm ki, prezident Rəisinin və baş diplomat Əmir Abdullahianın ölümü regionda heç bir yeni təhdid formalaşdırmayacaq".

Bunu Onews.az-a açıqlamasında Milli Məclisin keçmiş deputatı, politoloq Sona Əliyeva deyib.

Millət vəkili bildirib ki, hadisə baş verdikdən sonra Azərbaycan, Türkiyə, Rusiya, İraq İrana öz köməyini təklif etdi:

"Söhbət axtarış işləri ilə bağlı dəstəkdən gedir. Yəni bölgə ölkələri bu hadisədə yekdil dayanışma və birlik nümayiş etdirdilər. Ona görə də düşünürəm ki, bu hadisədən sonra regionda hər hansı gərginlik olmayacaq. İran rəsmilərinin sonuncu, eləcə də ABŞ Mərkəzi Kəşfiyyat İdarəsinin rəsmi şəxslərinin açıqlamaları hadisənin təbii qəza xarakterli olduğunu göstərir. Düşünürəm ki, mərhum İbrahim Rəisinin xələfi bölgə ölkələri ilə daha yaxından əməkdaşlıq edəcək".

Fuad Süleyman