Bura Avropanın ən qədim şəhərlərindən biridir.

Onu çox vaxt "əbədi şəhər", adlandırırlar.
Yeddi təpə üzərində yerləşdiyindən "yeddi təpə şəhəri" kimi də tanınır.

Onews.az xəbər verir ki, söhbət İtaliyanın paytaxtı, eyni zamanda Latsio regionunun inzibati mərkəzi Romadan gedir.

Şəhər Tibr çayı üzərində yerləşir.
Roma kürəyini yüzilliklərə söykəyərək bir neçə yüzillik adıçəkilən imperiyanın paytaxtı da olub.
Rəvayətə görə bünövrəsi eradan əvvəl 21 aprel 753-cü ildə Romul tərəfindən qoyulur.
Qədim Roma səlnaməçisi Liviusa görə Romanın özünəməxsus erasının maraqlı tarixçəsi var.
Hər şey latınların paytaxtı Alba Lonqanın hakimi Numitorun qardaşı Amuli tərəfindən devrilməsindən başlayır.

Qisasdan ehtiyat edən Amuli Numitorun qızı Rea Silvianın və Marsın oğulları Romul və Remi toxunma səbətə qoyur.
Daha sonra əkizləri Tibr çayına atır.
Xoşbəxtlikdən çayın sahilinə yan almış səbəti bir canavar tapır və əkizləri əmizdirir.
Bir qədər sonra çoban Faustul canavarın əmizdirdiyi əkizləri aşkar edərək övladlığa götürüb böyüdür.

Sonralar Mars əkizləri tapır.
Əhvalatı bildikdən sonra Alba Lonqaya qayıdan əkizlər Amulini öldürürlər.
Ardınca Numitoru yenidən hakim edirlər.
Mars onlara bir şəhər tikməyi tapşırır.

Şəhər tikildikdən sonra ad qoymaqda və kimin hakim olacağını müəyyən etməkdə çətinlik çəkirlər.
Rem şəhərin Rema, Romul isə Roma adlandırılmasını istəyir.
Qarşıdurmada Romul Remi öldürür və şəhərin hakimi olur.
Digər bir mənbəyə görə Roma sözü yunan mənşəli “Ρώμη” yəni “Rome” sözündəndir.
Anlamı "hünər, qoçaqlıq" mənasını daşıyır.

Yarandığı dövrdən bəri Roma şəhəri onlarla dövlətin paytaxtı olur.
Hazırda İtaliyanın baş şəhəri kimi turistlərin ən çox getmək istədiyi memarlıq diyarlarındandır.

Fuad Süleyman
Onews.az