AYB sədri Anar müəllim Rəsuloviçin 87 illik "yubileyi" haqqında yazılanlar bir daha yazıçı Anarın ədəbi çəkisini ortaya qoydu.

Məddahlıq qoxuyan və öz ədəbi ağırlıqları olmayan "imzalar" Azərbaycanın ortababdan da aşağı yazıçısını nəsrimizin şahmat taxtasında "fil"ə döndərməsinə ürək ağrısı ilə gülmüşəm...

Ədəbi prosesin "boz kardinalı" haqqında indi yazılanlar vaxtilə siyasətin "boz kardinalı" Ramiz Mehdiyev barəsində qələmə alınan şişirtmə, məddah yazılarını xatırladır.

Ramiz Mehdiyevin hakimiyyətdən uzaqlaşdırılmasından sonra onun haqqında ilk kəskin tənqidləri də bir vaxt ikiəlli qələmlə pişvazına duranlar yazmağa başlamışdılar.

Yəqin ki, Xalq yazıçısı Anar müəllim Rəsuloviçi də eyni aqibət gözləyir... Ən ağrılısı odur ki, 87 yaş 2 günlük Anar müəllim də fərqindədir. Amma bu cür diktatorlar üçün zaman "bugün müstəvisi"ndədir, sabahları özləri ilə aparacaqlarını düşünürlər...

Müstəqil Azərbaycanın ədəbi mühitinin yaltaqlıq və məddahlıq çiləkənlərindən təmizlənməsi üçün hələ iki-üç onillik lazımdır.

Əslində Anar müəllimin ədəbi BÜTünə "...pərəstlik" edənlərin böyük əksəriyyəti sağlıqlarında ikən imzalarının can verdiyini görənlərdir. Hələ onların ədəbi çəkilərindən, daş-tərəzilərindən yəni, nə qədər tərəfsiz "imza" olmalarından bir kəlmə də söz açmaq istəmirəm.

Ədəbi mühitdə haqsızlığa göz yumanların hamısı bu gün 38 illik diktatorun 87 illiyinə "güldən şirə çəkmək" ümidi ilə yığışan, amma bal vermək kodları olmayan "...arılardır...

Burada vaxtımı dayandırıram...

Tural Turan
Şair-publisist

Onews.az