Onews.az gənc yazar Günay Mirinin yeni şeirlərini təqdim edir:

***
“Payız ağac”

Narıncın, qızılın —
necədir sənin?
Payızın rənginə
beləmi bürünürsən,
yaşıl donunu soyunan ağac?

İnsafsız insanlar əzəndə səni,
duyurmu qolların
ağrını, ağac?

Külək yarpaqlarını qoparanda,
susurmu budaqların?
Hər düşən yarpaqla
bir az yüngülləşirsənmi?

İnsan ürəyindən
sevgini necə çıxarır,
görürsənmi?
Bir vaxt kölgəsində dincəldiyi
ağacı necə yad sayır?

Yarpaqlar tökülür,
kök torpağa sarılır —
ayrılıqla bağ
daha da dərinləşirmi?

Hər payız özündən
bir parça verirsən torpağa,
itirdiklərini sayırsanmı?
Hər düşən yarpaq
sənə özünü xatırladırmı?

İnsan da beləmi dəyişir —
sevdiklərindən ayrıldıqca
öz kökünə sarılırmı?

***

Vətən kimi sev məni

...Şəhid qanı
damarımda dolaşsın,
səssizliyim
Vətənə çevrilsin.

Sərhəddə dayan,
sevgimə keşik çək —
gecəyə sinə,
andına sadiq ol.

Vətən kimi sev məni —
bayraq ucalığında,
torpağın müqəddəsliyində,
şəhidlərin əbədiyyətində.

Günay Miri
Gənc yazar
Onews.az