Təbiətin dəyişməz balansı və milli kimliyin mənəvi şifrələri

​Dünyanın quruluşuna nəzər saldıqda hər şeyin dəqiq ölçülü bir tarazlıq və nizam üzərində qərar tutduğunu görürük. Günəş olmasa Ay işıqlanmaz, çaylar axıb dənizlərə qovuşmasa sular təzələnməz, fəsillərin ardıcıllığı pozularsa təbiət həyat vermək qabiliyyətini itirər. Dağların dayaq, ağacların bəhrə, buludların yağış və qar olduğu bu nizam təkcə fiziki aləmə deyil, insanın mənəvi dünyasına da şamil olunur.

İnsan həyatında da hər hissin, hər addımın öz qarşılığı var.

Sağ ilə solun, maddi ilə mənəvinin balansı pozulduqda fərd deqradasiyaya, cəmiyyət isə böhrana sürəklənir.

​Müasir dünyada inkişaf və tərəqqi tez-tez yanlış olaraq köklərdən qopmaq kimi qəbul edilir. Lakin həqiqi inkişaf mənəviyyatı azaltmaq deyil, əksinə, onu müasir biliklərlə zənginləşdirməkdir. Milli dəyərlərimizi, adət-ənənələrimizi "köhnəlik" və ya "gerilik" adlandıraraq gözdən salmağa çalışanlar, zahirən müasir görüninsələr də, daxilən böyük bir ruhi boşluq və narahatlıq yaşayırlar. Çünki öz kökündən ayrılan ağac nə qədər bəzəkli olsa da, ilk güclü küləkdə aşmağa məhkumdur. Atalarımızın "Ağac kökü üzərində bitər" kəlami məhz bu mənəvi həqiqətin əsrlərdən bəri süzülüb gələn hikmətidir.

​Azərbaycan xalqı yüzilliklər boyu özünün zəngin ziyalılıq mühiti, ailə müqəddəsliyi, böyüyə hörmət və kiçiyə qayğı kimi mental prinsipləri ilə özünəxass bir mədəniyyət formalaşdırıb. Bu dəyərlər təkcə keçmişin mirası deyil, gələcəyimizin təminatıdır.

Nəfsinə sahib çıxmaq, mənəvi balansı qorumaq və özündən sonra gələn nəsillərə sağlam bir irs qoymaq hər bir insanın bu dünyadakı ən böyük missiyasıdır.

​Milli dəyərlərin qorunması məsələsi dövlətçilik təfəkkürümüzün də ana xəttini təşkil edir. Hətta deyərdim ki, bu nüans dövlətçilik xəttinin ana sütunlarından biridir.

Azərbaycan Respublikasının Prezidenti, Müzəffər Ali Baş Komandan İlham Əliyevin dəfələrlə öz çıxışlarında vurğuladığı kimi:

​"Bizim gələcəyimiz milli dəyərlərimizlə bağlıdır. Gənc nəsil milli ruha, köklərə bağlı, vətənpərvər ruhda tərbiyə olunmalıdır. Milli dəyərlərimizə sahib çıxmaq hər bir Azərbaycan vətəndaşının mənəvi borcudur."

​Bu gün biz bir millət olaraq tərəqqi edərkən, dünya inteqrasiya olunarkən öz mənəvi pasportumuzu — milli kimliyimizi unutmamaq öhdəliyi daşıyırıq. Çünki tarix sübut edir ki, yalnız öz adət-ənənəsinə, dilinə və mədəniyyətinə sahib çıxan xalqlar qlobal dalğalar qarşısında öz müstəqilliyini və varlığını qoruya bilirlər. Bizdən sonrakı nəsillərə ötürəcəyimiz ən böyük sərvət məhz bu sarsılmaz mənəvi bünövrədir.

Tural İbrahimov
Publisist
Onews.az