"Kürdüstan layihəsinin arxasında dünyanın böyük korporasiyaları, eləcə də ABŞ və İsrail kimi dövlətlər dayanır. Bu layihə bir Britaniya projesidir. İndi onun icraçıları ABŞ, İsrail, Fransa kimi ölkələrin bədnam maliyyə donorlarıdır. Məqsəd isə türk dövlətçiliyini aradan qaldırmaq, "parçala, hökm sür" siyasətini yeni müstəviyə daşımaqdır".

Bunu Onews.az-a açıqlamasında V çağırış Milli Məclisin deputatı, politoloq Sona Əliyeva deyib.

Keçmiş millət vəkili bildirib ki, güclü Türkiyə isə həmişə Kürdüstan projesinin önündə ciddi maneədir:

"İsrail baş nazirinin oğlunun paylaşdığı xəritə də məhz yenidən Türkiyəni bu çıxılmaz uçuruma sürükləməkdir. Yair Netanyahu bu xəritəni Türk Ordusunun Metinada irəlilədiyi, bütün strateji yüksəklikləri nəzarətə götürdüyü vaxtda paylaşıb. Deməli, Türkiyənin İraqın şimalında möhkəmlənməsi yəhudilərin və amerikalıların maraqlarına böyük zərbə vurub. Türkiyə son 45 ildə çox ağır sınaqlardan çıxdı. Terrorla mübarizədə 50-dən çox şəhid verdi. İndi Ankara ona qarşı uzanan əli kökündən kəsməyə qərarlıdır. Bu yolda onun arxasında müttəfiqləri yox, öz iradəsi dayanır. Hətta Osmanlı dövlətinin imici də Türk Ordusunun hərəkət etdiyi yerlərdə ona kömək edir".

Ekspertin sözlərinə görə, hazırda Güney Azərbaycanda da vəziyyət gərgindir:

"Silahlı kürdlər əliyalın Azərbaycan turklərini sıxışdırıb çıxarmaq istəyir. Hətta son 20 ildə farslar tərəfindən xeyli sayda kürd Urmiya, Mərənd kimi ərazilərdə yerləşdirilib. İndi Təbriz əhalisinin demoqrafik vəziyyətini dəyişmək üçün varlı kürdlər üsyanlar şəhərinə yerləşdirilir. Düşünürəm ki, Güney Azərbaycanın qeyrətli oğulları bu prosesi durdurmağı bacaracaq. Kərkük türklərinin yaşadığı bölgələrdə də eyni durumdur. Vaxtilə Ərbil başdan-başa bir türkmən şəhəri idi. Sonra onların başına minbir müsibət gətirən kürdlər türkmən qardaşlarımızı yerlərindən, yurdlarından didərgin saldılar. İndi Ərbil kürd separatçılarının əsas mərkəzidir. Bütün bunlar da ABŞ və İsrail dərin dövlətlərinin birgə oyununun bir parçasıdır. Düşünürəm ki, Türkiyəyə gücləndikcə Kürdüstan prosesi ləngiyəcək və proje kimi aradan qalxacaq. Bu istiqamətdə Türk dünyasının birləşməsi də çox önəmlidir. El məsəlidə deyildiyi kimi; el bir olsa zərbi kərən sındırar".

Fuad Süleyman