Bu dəfə yolumuz Avropanın ən ucuz ölkəsinə - Kosovayadır.

Bir çox dövlətlər, o cümlədən, Azərbaycan 2008-ci ildə Serbiyadan ayrılmış bu ölkənin müstəqilliyini tanımır.
Amma yığma və klublar səviyyəsində Kosova ilə rəsmi oyunlarda üz-üzə gəlmişik.

Onews.az-ın araşırmasına görə, qardaş Türkiyə isə Kosovanın müstəqilliyini ilk tanıyan dövlətlərdəndir.

400 il Osmanlının bir parçası kimi inkişaf edən bu kiçik dövlət Azərbaycanın səkkizdə biri qədərdir.
Burada bütün şəhərlərdə, hətta kəndlərdə Osmanlı izini görmək mümkündür.
Paytaxtı Osmanlı dövründə salınan Priştinadır.

Türk dilini bilirsinizsə, Kosovanı gəzərkən heç bir problem yaşamayacaqsınız.
Ölkə əhalisi turizmin inkişafına meyilli olduğu üçün bəlli səviyyədə ingilis dilini də bilir.
Bu Balkan ölkəsinin əsas pul vahidi hazırda Avrodur.

Burada digər Avropa ölkələrinə nisbətən qiymətlər çox ucuzdur.
Ərzaq qiymətləri və digər məhsulların dəyəri də qənaətbəxşdir.
Kosovalıların türklərə və azərbaycanlılara sevgisi, rəğbəti də böyükdür.

Əhalinin 91 faizi müsəlmandır.

Priştinada eyni anda həm azan səsini, həm də kilsə zənglərini eşitsəniz təəccüblənməyin.
Çünki Osmanlı multikulturalizmi Kosovada hələ də hakimdir.

Otellərdən başqa şəxsi evlərdə 200-300 avro verərək bir həftəlik mehman ola bilərsiniz.
“Visa kart”larınızdan pul çəkmək istəsəniz qardaş Türkiyənin Kosovadakı banklarına üz tutun.

Çünki yerli banklarla müqayisədə pul dəyişimi sizin üçün daha sərhəli olacaq.
Priştinanın simvolu isə şəhərin göbəyində yerləşən Rahibə Teresa katedralıdır.

1 avro qarşılığında katedralın ən yüksək nöqtəsinə çıxaraq bütün Priştinanı seyr etmək mümkündür.

Paytaxtın ikinci ən gözəl sinvolu isə Kosova Milli Kitabxanasıdır.
Bura turistlərin ən çox axın etdiyi məkanlardandır.

Priştinanın mərkəzi meydanı isə ölkənin ürəyi - ən qaynar nöqtəsi sayılır.
Ən gözəl kafelər və restoranlar da buradadır.

Bəs siz Kosovaya kiminlə getmək istərdiniz?

Tural Turan