O, Türkiyə kinosunun ilk qadın aktrisası kimi adını tarixə yazdırmağı bacarır.

Türk kinosunun ilk qadın kinorejossoru da həmz bu xanımdır.

Qardaş ölkənin film tarixində ilk qadın film prodüsseri də məhz odur.
Bütün Türkiyənin dilləri əzbəri olan bu xanımın ailə həyatı uğursuz olur.

Daha sonra min bir əziyyətlə qurduğu film şirkəti bir gecədə yanaraq külə dönür.
Ard-arda keçirdiyi sarsıntılardan sonra psixi durumu sözünə baxmır.
Ömrünü İstanbul küçələrində “bomj” kimi başa vurur.

Onews.az-ın araşdırmasına görə, söhbət Türkiyə mədəniyyət tarixinə adını qızıl hərflərlə yazdırmış Cahidə Sonkudan gedir.

Əsl adı Cahidə Sərab olan bu aktrisa 27 dekabr 1919-cu ildə Yəməndə anadan olur.
Həmin vaxt Yəmən Osmanlı dövlətinin bir əyaləti idi.
Atası Osmanlı dövlətində baş leytenant, babası isə Osmanlının əyalət paşası sayılırdı.
Cahidə xanım Hələ uşaq vaxtlarından sənətə həvəsli olur.

Əvvəl xalq evlərində, sonra isə İstanbul şəhər teatrında fəaliyyət göstərir.
Epizodik rollarda çıxış edir.

Uilyam Şekspir, Lev Tolstoy, Anton Çexov kimi məşhur yazıçıların əsərlərinin səhnə quruluşunda rol alır.
1933-cü ildə rejissor Muhsin Ərtoğrulun "Yeddi kəndin Zeynəbi" tamaşasındakı rolu ilə özünün nəyə qadir olduğunu göstərə bilir.
Ərtoğrul gənc qızın potensial imkanlarını qiymətləndirərək, onu filmdə çəkilməyə dəvət edir.

Elə həmin il ekranlara çıxan "Söz bir, Allah bir" filmində rol alan bu sarışın aktrisa kinoda ilk addımını atır.
Onun ilk rolundan razı qalan rejissor Muhsin Ərtoğrul tezliklə Cahidəni daha bir filmə dəvət edir.
1934-cü ildə türk kino tarixində kənd mövzusunda çəkilmiş ilk kino lenti kimi tanınan "Bataqlı damın qızı Aysel" filmində rol alır.

Bu filmdəki istredadı ilə aktrisa tamaşaçıların sonsuz sevgisini qazanır.

Özünü kinorejissorluqda da sınayan Cahidə "Fədakar ana" filmi ilə adını türk kino tarixinə ölkənin ilk qadın kinorejissoru kimi yazdırır.

Qazandığı uğurlardan ruhlanan Cahidə 1950-ci ildə "Sonkufilm" şirkətini yaradır.
Keçmiş həyat yoldaşı Tələt Artemel və Sami Ayanoğlu ilə birlikdə "Vətən və Namik Kamal" filmini ekranlaşdırır.
1951-ci ildə "Ulduz" jurnalının keçirdiyi müsabiqədə həmin əsər "Ən yaxşı film", Cahidə isə "Ən yaxşı aktrisa" seçilir.

1953-cü ildə çəkilən "Gözlənilən mahnı" filminin rejissoru da Cahidə özü olur.

Filmdə Cahidə Sonku müğənni Zəki Mürənlə çəkilir.
Həmin vaxtlar sənətdə ilk addımlarını atan, hələ tanınmayan gənc tələbə Zəkini baş rola Cahidə özü dəvət etmişdi.
Hər iki sənətkarın oyunu uğurlu alınır.

Onlar öz oyunlarıyla bir-birlərini tamamlaya bilirlər.
Bu film Zəki Mürənin yaradıcılığında şöhrətə aparan yolun davamı, Cahidə Sonkunun həyatında isə sonun başlanğıcı idi.

Qızı Ender uzun illər Londonda yaşamışdı.
Lakin imkansızlıq üzündən təhsilini bitirə bilməmişdi.

Aktrisanın qızı bir müddət ucuz restoranlarda işləyir, daha sonra isə itkin düşür.
Ailə həyatındakı uğursuzluqları və "Sonkufilm" şirkətinin külə dönməsi Cahidənin həyatını dəyişdirir.

Depressiyaya düşən Cahidənin içkiyə aludəçiliyi onu yavaş-yavaş sevdiyi işindən ayırırdı.
Ömrünü İstanbul küçələrində səfil bir qadın olaraq başa vurur.
O, 18 mart 1981-ci ildə, 64 yaşında ikən vəfat edir.

Tural Turan