O, əslən azərbaycanlı olan fransız aktyorudur. 2015 Avropa Oyunlarının məşəldarlarındandır. Avrasiya Akademiyasının üzvlərinin biridir.

Onews.az-ın “Araşdırma Redaksiyası”na görə, söhbət əslən azərbaycanlı olan fransız aktyor Rober Osseyndən gedir.
Rober Osseyn 30 dekabr 1927-ci ildə Parisdə anadan olur. Atası Andre Osseyn (Əminulla Hüseynov) Səmərqənddə doğulan İran azərbaycanlılarından idi.

Oktyabr çevrilişindən sonra Fransaya mühacirət edir. Anası isə Bessarabiyanın (indiki Moldova) Soroki şəhərindəndir.
Onun anası teatr aktrisası Anna Minevskaya idi. Rober ana tərəfdən milliyətcə yəhudidir.

Rober Osseyn daha çox teatrda fəaliyyət göstərsə də, kinoda da aktyor və rejissor kimi tanınır. Ən məşhur rolu Joffrey de Peyrak obrazı olur.

Rober Osseynin kino karyerası Pol Kadeakın 1954-cü ildə çəkdiyi «Sarışınlar sahili» filmindəki rolu ilə başlayır.

Qamətli, aydın sifətli, duru baxışlı gənc — o, kino həvəskarlarının yadında beləcə qalır. Roberi tamaşaçılara sevdirən təbii oyunu, ustalıqla yaratdığı maraqlı ekran qəhrəmanlarıdır.

Rene Simon kursunda aktyorluqla yanaşı, rejissorluq təcrübəsinə də yiyələnir.

O, qəhrəmanlarını sevməyi və sevdirməyi bacarır. Obrazları ilə Fransanın keçmiş prezidenti Şarl de Qollun da ürəyini fəth edə bilir.

Şekspir, Dostoyevski, Edqar Po kimi yazıçıların qəhrəmanlarını fransız səhnəsinə gətirir.

O, 1970-ci ildən başlayaraq doqquz il Reymsdəki Milli xalq teatrının rəhbəri olur. 1985-ci ildə «Yuli Sezar», onun ardınca «Leon xidmətçisinin işi», «Səfillər», «İsus adında insan» və digər əsərlərə səhnə quruluşu verir.

Bu quruluşlar ümumilikdə Avropada maraqla qarşılanır.
Həyat yoldaşı Marina Vladi ilə bir neçə filmdə oynayır.

Dünya şöhrətli Azərbaycan əsilli aktyor 31 dekabr 2020-ci ildə vəfat edir. Vəfatı ilə əlaqədar olaraq Azərbaycan Prezidenti İlham Əliyev və Birinci vitse-prezident Mehriban Əliyeva aktyorun ailəsinə başsağlığı verirlər.

Turan