"Kütləvi etiraz aksiyasının təşkil edilməsi müxalifətin hazırlamalı olduğu zirvə nöqtəsidir və bu zirvə, təbii ki, parlamentin ilk iclası günü olacaq".

Onews.az xəbər verir ki, bu barədə Gürcüstanın keçmiş prezidenti, “Güclü Gürcüstan” Koalisiyasının liderlərindən biri Giorgi Marqvelaşvili açıqlama verib.

Onun sözlərinə görə, noyabrın 25-dək vəziyyət müyyən edilməli və buna görə addımlar atılmalıdır:

“Mütləq aksiyaların bir zirvə nöqtəsi olacaq. Deputatın gizli şəkildə parlamentə daxil olub Gürcüstanı necə idarə etməsi ayrı mövzudur. Düşünürəm ki, noyabrın 25-nə qədər hələ vəziyyət müəyyən edilməlidir. Bu günlər keçirilən aksiyalar cəmiyyəti nikbinliyə hazırlayıb. Yavaş-yavaş getdikcə daha çox sosial qrup depressiyadan hərəkətə keçir. Pik günlər çox vacibdir. İstər 25, istərsə də başqa gün olsun, pik nöqtəsi olmalıdır. Biz qalib gələcəyimizə hər gün inanmalıyıq, lakin yanlış gözləntilər yaratmamalıyıq".

Onun sözlərinə görə, müxalifətin Tbilisi küçələrində davamlı nümayişlər keçirməsi uğurlu addım olub:

“Məncə, aksiyalar siyasətçilərin atdığı çox uğurlu addım idi. Bu gün iki mühüm siyasi məqsədə nail olunub: parlamentdə müxalifətin açıq-aşkar olmaması, bu, Kommunist Partiyasının rəhbərliyi altında buranın Sovet Gürcüstanı olduğunu birmənalı şəkildə daha da aydınlaşdıracaq, ikinci məqsəd nihilizm və məyusluğun aradan qaldırılmasıdır. Keçirilən aksiyalar bunun bir göstəricisi idi. Bu aksiyalar nihilizm, məyusluq və depressiyanı azaltdı".

Parlament mandatlarının və siyahılarının bağlanması məsələsinə gəlincə, Marqvelaşvili qeyd edib ki, müxalifət siyahıların bağlanmasını təsirli addıma çevirə bilməyib:

“Bir siyasətçinin karyerasında parlamentə getməmək və deputatlıqdan imtina etmək ən ciddi addımdır. Göründüyü kimi, bu addımı dörd müxalifət partiyası təsdiq etdi, lakin bu, çox təsirli bir addım ola bilmədi. Faktiki olaraq, dörd siyasi subyekt dörd fərqli dildə və ritorikada eyni şeyi dedi, amma bu, seçicilər üçün nə anlaşılan, nə də təsirli oldu" , - deyə Marqvelaşvili qeyd edib.

Elgiz Məmməd