Aparıcı Kiselyovun prezident Əliyevə Türkiyənin Azərbaycanda hərbi baza açıb-açmayacağı ilə bağlı sualı birbaşa Kremlin diktəsidir.

Əslində daha dəqiq desək, nəbz yoxlamasıdır.

Kreml dəqiqləşdirmək istəyir ki, Türkiyəyə baza yaratmaq icazəsi veriləcəksə, bu Rusiyaya da şamil olunacaqmı?!.. Çünki Rusiya da Türkiyə kimi Azərbaycanla strateji müttəfiqdir.

Amma Moskva unudur ki, Bakı Ankara ilə imzaladığı Şuşa Bəyannaməsini ratifikasiya edib. Amma Moskva ilə imzalanmış strateji sənəd hələ də Azərbaycan parlamentinin təsdiqindən keçməyib.

Yəni, şimal qonşumuzla 45 ay öncə imzalanan saziş ratifikasiya olunmayıb.

Bir sözlə, Türkiyə ilə müttəfiqliyimiz tamdır və rəsmidir. Amma ruslarla bağlaşdığımız tüzük hələ də yarlıq halını almayıb.

Rus diplomatiyası və dərin dövləti 2020-ci ilin payızında Qarabağa yerləşdirdiyi və 2023-cü ilin payızında çıxarmağa məcbur qaldığı ordusunu yenidən Azərbaycanın içərilərinə qaytarmaq istəyir.

Kreml hələ də Azərbaycan ərazilərindən rus hərbçilərinin çıxarılmasını həzm edə bilmir...

Tural Turan
Siyasi şərhçi

Onews.az