"Hazırkı situasiyada Rusiya və Ukrayna arasındakı sülhün əldə olunmasında ən dürüst, eyni zamanda tərəfsiz vasitəçi Azərbaycan ola bilər. Digər dövlətlərin vasitəçilik missiyası o qədər də şəffaf olmayacaq".

Bunu Onews.az-a açıqlamasında siyasi şərhçi Tural Turan deyib.

Ekspertin sözlərinə görə, Qərb koalisiyası - ABŞ və Fransa özünü vasitəçi kimi sırımağa çalışsa da onlar tərəfdir və Ukraynanı silahlandıran əsas güc mərkəzləridir:

"Ona görə də Qərbin "vasitəçilik eşqi" heç bir halda effektiv deyil. Uzaqbaşı zorakı atəşkəsə nail olmaq istəyəcəklər. Bu da nə Kiyevin, nə də Kremlin maraqlarını tam şəkildə ödəyəcək. Çin və İran isə daha çox Rusiyanın maraqlarını müdafiə edən ölkələrdir. Hətta hər iki ölkə savaşın gedişində Rusiyaya xeyli dəstək verib. Bu dəstək həm hərbi, həm də siyasi-iqtisadi müstəvidə gerçəkləşməkdədir. Ona görə də Pekinlə Tehran da Ukrayna savaşında vasitəçi olmaq şanslarını itirib. Türkiyə isə region ölkəsi olsa da, NATO blokunda yer alır. Müəyyən mənada tərəfdir. Azərbaycan isə MDB ölkəsidir. Ukrayna və Rusiya ilə azı 70 illik ortaq tarixi paylaşıb. Rusiya ilə müttəfiqlik sazişi imzalansa da parlamentimiz onu ratifikasiya etməyib. Üstəlik, müharibə dövründə Ukraynaya milyonlarla dollar dəyərində humanitar yardımlar göndərib. Bu baxımdan, hər iki tərəf üçün neytral və səmimi vasitəçi Azərbaycandır. Düşünürəm ki, tərəflər sülh prosesində bu təklifi nəzərdən keçirə bilərlər".

Banu Murad