Bu gün İlham Əliyev nəinki Avropada, hətta bütün dünyada odla su arasındakı ölkənin sülh fenomeni kimi tanınır. Azərbaycan prezidenti 2008-ci il Gürcüstan-Rusiya savaşında çox ağıllı yol tutaraq Azərbaycanı gələcək təhlükələrdən sığortalaya bildi. İranla gərginlikdən də alnıaçıq çıxdı. Hətta 44 günlük savaşdan sonrakı proseslərdə də riskləri uğurla idarə etdi. Bütün bunlar dünyanın gözü qarşısında baş verir. Prezident Əliyev Azərbaycanın xarici siyasətini möhkəm təməllər üzərində formalaşdırıb.

Digər tərəfdən, indi Zəngəzur dəhlizi vasitəsi ilə Azərbaycan dünyaya günəş kimi doğur. Rus qazından və neftindən asılı olan Avropa indi Azərbaycana gözlərini dikib. Vaxtilə NABUKKO layihəsinə ağız büzən Avropa dövlətləri şimal və cənub dəhlizlərinin iflic duruma düşməsindən sonra Azərbaycanın ətəyindən möhkəm yapışıblar.

Hətta bir sıra Qərb liderləri İlham Əliyevlə görüşmək, foto çəkdirmək üçün növbəyə düzülüblər. İndi Moldovadan Balkanlara, Prineydən Apeninə qədər Qərb dövlətləri Azərbaycanın təbii resurslarına ümid bəsləməkdədirlər. Onlar Rusiyanın “mavi dəyənəyindən” qurtulmaq üçün Azərbaycana alternativi olmayan nəfəslik kimi baxırlar.

Hazırda Avropa Çindən Britaniyaya uzanan “Bir kəmər-bir yol” layihəsinə böyük ümidlər bəsləyir. Həmin layihənin də əsas geostrareji mərkəzlərindən biri məhz Azərbaycandır. Üstəlik, Mərkəzi Asiya ölkələrinin təbii resurslarının Azərbaycan üzərindən Avropa bazarlarına çıxması məsələsi ön plandadır.

Bu baxımdan da Qərb liderləri Azərbaycan prezidentinin bu məsələni də ustalıqla həll edəcəklərinə inanırlar. Çünki Azərbaycan Prezidenti İlham Əliyev bu istiqamətdə də böyük işlər görüb və görməkdədir.

Sona Əliyeva
V çağırış Milli Məclisin deputatı
Onews.az