Bu dəfə yolumuzu şimal qonşumuzun baş kəndi Moskvadan salacağıq.

İlk olaraq onu vurğulayaq ki, müasir Azərbaycan dilində işlənən “Moskva” sözü ruscada işlənən eyni tələffüzlü alınmadır.
Şəhər Moskva çayının adına qoyulub.

Onews.az-ın araşdırmasına görə, tarixi Azərbaycan mənbələrində isə Məsko, Məskov, Mosqov, Mosqova şəkillərində qeyd olunub.

Böyük Moskva knyazlığı, Çar Rusiyası, Rusiya imperiyası, RSFSR və SSRİ-nin paytaxtı kimi adını tarixə yazdırıb.
II Dünya müharibəsi dönəmində hərbi əməliyyatlarda fərqləndiyinə görə “Qəhrəman şəhər” statusunu alır.
Şərqi Avropa düzənliyində, Oka və Volqa çayları arasında yerləşir.

Rusiya Federasiyasının subyekti kimi Moskva və Kaluqa vilayətləri ilə həmsərhəddir.
Moskva Rusiyanın məşhur turizm mərkəzidir.

Burada yerləşən Kreml, Qırmızı meydan, Novodeviçi monastırı YUNESKO Ümumdünya irsi siyahsına əlavə edilib.
Şəhər mühüm nəqliyyat qovşağı sayılır.

Burada 6 aeroport, 9 dəmir yolu vağzalları və 3 çay limanı var.
1935-ci ildən Moskvada metropoliten fəaliyyət göstərir.
Moskva həmçinin ölkənin idman mərkəzi sayılır.

1980-ci ildə burada XXII Yay Olimpiya Oyunları, 2018-ci ildə isə futbol üzrə dünya çempionatı keçirilən şəhərlərdən biri olub.
Moskvanın görməli yerlərindən ən birincisi bütün Rusiyanın simvolu sayılan Moskva Kremlidir.
Tarixi mənbələrdə ilk dəfə 1156-cı ildə adı çəkilən Kreml şəhərin mərkəzində Borovitsk təpəliyində yerləşir.

Vasili Blajennı kilsəsi Moskvanın ən möhtəşəm qədim memarlıq abidələrindən sayılır.
Hələ XVI əsrdə səyahətçiləri heyrətə gətirən bu kilsə ruslar üçün milli xarakterin və vətən tarixinin simvoluna çevrilib.
Moskvanın cənub-qərbində yerləşən Novodeviçi adlanan qadın monastrı XVI–XVII əsrdə yaranıb.

YUNESKO tərəfindən dünyanın mədəni sərvətləri siyahısına salınan monastır Rusiyanın ən gözəl memarlıq abidəsi sayılır.
Şəhərin mərkəzi meydanı olan Qızıl meydan Kremlin şərq divarının qarşısında yerləşir.

Bu meydan yüz illər boyu Rusiyanın tarixində baş verən ən önəmli hadisələrə şahidlik edib.
Xrista Spasitel məbədi 1812-ci ildə Napoleon üzərində qələbənin şərəfinə rus çarı I Aleksandrın əmri ilə tikilib.
Arbat Moskvanın ən məşhur küçəsidir.

1993-cü ildə bu küçə 500 illiyini qeyd edib.
Burada Puşkinin, Lermontovun ev muzeyləri yerləşir.
Moskvanın gerbi, bayrağı və himni şəhərin rəsmən təsdiqlənmiş rəmzləridir.


Moskvanın gerbi və bayrağı tünd-qırmızı heraldik qalxan və üzərində qara ilanı vuran Müqəddəs Georginin təsvir olunduğu düzbucaqlı taydan ibarətdir.
Moskvanın çoxlu qardaşlaşmış şəhərləri var. Onların böyük hissəsi XX əsrin 90-cı illərində yaranıb.

Berlin və Buenos-Ayres Moskva ilə ilk qardaşlaşmış şəhərlərdir.
Rusiya paytaxtı 2018 FİFA Dünya Kubokuna da ev sahibliyi edib.

Rauf Süleymanov