Dunay çayı bu şəhəri iki hissəyə ayırır.
Yüzilliklər boyu Osmanlının ən gözəl şəhərlərindən hesab olunurdu.

Rəngli binaları ilə Avropanın göz bəbəyi sayılır.
Bu şəhərin əhalisinin dörddə biri evsizdir.

Evi olanlardan bəziləri isə mənzillərini kirayə verərək küçələrdə yaşamağı üstün tuturlar.

Onews.az-ın araşdırmasına görə, söhbət Macarıstanın paytaxtı Budapeştdən gedir.

Şəhər iki hissəyə - Budaya və Peştə bölünür.
Buda və Peşt 1873-cü ildə birləşərək bu möhtəşəm şəhəri formalaşdırır.
Paytaxtın “köhnə şəhər” hissəsi “Old Buda”dır.

Memarlıq sənətinin qanunlarına uyğun tikilən tarixi binalar göz oxşayır.
Turistlərin diqqətini çəkən əsas məqamlardan biri də şəhərin bəzəkli sarı tramvay xəttidir.
Qışın soyuğu sıra ilə düzülmüş tarixi tikililəri solğun göstərir.
Amma içəri daxil olanda sizi kifayət qədər modern və rəngli interyer salamlayır.
Ümumilikdə bu şəhərdə qədim evlər, abidələr, qəsrlər və saraylar heç vaxt öz cazibədarlığını itirmir.
Küçələrin hər tini bir film səhnəsini xatırladır.

Budapeşt deyildikdə ağıla ilk gələnlərdən biri şübhəsiz ki, Dunay çayıdır.
Dunayla bütövləşən Szeçeni körpüsü şəhərin əsas simvollarındandır.

Macarıstanın milli qüruru sayılan Parlament Binası isə Budapeştə möhtəşəm gözəllik qatır.

Şəhərin Peşt hissəsində yerləşən Macarıstan Parlament Binası həm Macarıstan, həm də Avropa tarixi baxımından böyük əhəmiyyətə malikdir.
Macar krallarının yaşadığı 691 otaqlı tarixi abidə isə əsas turizm nöqtələrindən sayılır.
Budapeşt həm də “cızma-qaralamalar” şəhəridir.

Gənclər boz, darıxdırıcı divarların çoxunu əlvan rənglərə boyayaraq “öz əsərlərini” diqqət obyektinə çevirə bilirlər.
Küçələrdə qraffiti və ya stensil üslubunda işlər həddən artıq çoxdur.

Yazılar isə müxtəlifdir – gülməli, ironik, üsyankar və ya adi əlvan rəsmlər...

Bütün bunlara əlavə olaraq, bugünkü Budapeşt orijinal ekskursiyaları və əyləncələri ilə məşhurdur.

Gecə həyatını sevən macarlar həm də “escape room” (Qaçış otağı) adlanan oyun mərkəzləri ilə öyünə bilər.
Şəhərin ən gözəl nöqtələrindən biri də Elizabet körpüsüdür.

Andrassi bulvarı ilə Opera pinası isə xüsusi memarlıq üslublarına görə fərqlənirlər.
Hər iki turistik mərkəz YUNESKO tərəfindən qorunur.

Hər il Budapeştə YaY Festivalı keçirilir.

Bu festivala dünyanın müxtəlif ölkələrindən 100 minlərlə əyləncə sevən insan qatılır.
Musiqi festivalı 12 həftə davam edir.

Turistləri cəlb edən yerlərdən biri də Marqaret adasındakı Açıq Hava Teatrıdır.

Tural Turan