Nyu-Yorka səyahət imkanınız olarsa, Zibil muzeyini ziyarət etməyi yaddan çıxartmayın.

Zibil dedikdə ağlınıza konfet kağızları, banan qabığı, boş süd şüşəsi filan gəlməsin!
Buradakı zibillər keçmişdəki xatirələrinizi yenidən gözlərinizin önünə sərəcək.

Onews.az xəbər verir ki, söhbət bir zamanlar evlərin ayrılmaz parçalarından olan, lakin indi istifadə edilməyən əşyalardan gedir.

Məsələn, əski lampalar, köhnə mebellər, qədimi kitab rəfləri, yüzillik tablolar və sair…
Hətta köhnə fotolardan uşaq oyuncaqlarına qədər hər şeyi burada görmək mümkündür.
Qeyri-adi muzeyin banisi yerli sakinlərdən biridir.

Cənab Molina adlı Nyu-York sakini muzeyin təməlini 1994-cü ildə qoyur.

O, kolleksiyanı yığmağa başlayanda ilk nüsxələrini öz qarajında saxlayır.

Qarajda zibil qutusunda tapılan bütün əsərləri qorumaq üçün, o, muzey açmaq qərarına gəlir.
Hazırda Zibil Muzeyi iki mərtəbəli böyük binada yerləşir.

Maraqlıdır ki, muzey sahibi həm də pis vəziyyətdə olan “zibilləri” təmir edir.
Yəni, muzeydə təklif olunan cihazların çoxu işlək vəziyyətdədir.

Cənab Molina bu vaxta qədər muzeyin toplanmasına 5 milyon dollardan çox vəsait xərclədiyini deyir.

Hazırda ABŞ dövləti muzeyin saxlanması üçün sahibinə hər il 100 min dollar vəsait ayırır.
ABŞ hökuməti bu muzeyi “tullantıların idarə olunması işi”ndə örnək addım kimi qiymətləndirir.

Bir çox tanınmış şəxslər buranı “zibillərin əsrarəngiz sarayı” adlandırmaqdan çəkinməyiblər.
Muzeyə giriş 12-15 dollar arasında dəyişir.

Tural Turan