Yaxın onillikdə Özbəkistan - xüsusən də Daşkəndlə Səmərqənd Orta Asiyanın, Türküstan regionunun əsas ədəbiyyat və mədəniyyət mərkəzlərinə çevriləcək.

2015-ci ildən Özbəkistan rəhbərliyinin ədəbiyyata və mədəniyyətə ayırdığı xüsusi qayğını diqqətlə izləyirəm.

Hətta 2018-ci ilin noyabrında 6 günlük Özbəkistan səfəri zamanı qardaş ölkədə bu istiqamətdə baş verən müsbət dəyişiklikləri, yenilikləri gözlərimlə görmüşəm.

Çox böyük mədəniyyət tədbirlərinə ev sahibliyi edən Özbəkistan bu istiqamətdə Orta Asiyanın ən aparıcı ölkəsinə çevrilib.

On il bundan öncəyə qədər Türküstan regionun qeyd-şərtsiz lideri Nursultan Nazarbayevli Qazaxıstan idi.

İndi Şövkət Mirzəyevin kapitanlığındakı Özbəkistan Türküstanın qızıl günəşinə dönüşüb.

Burada gənclərə, onların istedadına xüsusi diqqət yetirilir. Gənclərin inkişafı üçün yeni-yeni mədəni mərkəzlər açılır.

Özünüinkişaf proqramları bir-birini əvəz edir. Bir sözlə, indi Özbəkistan Orta Asiyanın əsas Şərq qapısıdır. Bu qapıdan içəri keçsəniz, siz də qardaş ölkənin kültür xanimanına tamaşa edə bilərsiniz.

Qardaşlarımız hətta Tacikistanı, Əfqanıstanı da öz qanadları altına alaraq tacik və əfqan gənclərinə də qucaq açıblar.

Türk kültürünün yeni inkişaf çağını öz qonşuları ilə bölüşürlər.

Bir sözlə, Daşkənd və Səmərqənd artıq on ildir ki, Türküstan coğrafiyasında təzə yüzilin yeni barış missiyasına start verib.

Tural Turan
Şair-publisist

Onews.az