Onews.az şair Tural Turanın "Gecə tabloları" şeirini təqdim edir:
***

Gecə iki...
Girmişəm bir yuxunun qoynuna.
Sərsəm gəzən işıqların
sarılmışam boynuna...

Soyunmuşam göz yaşımı,
geydirmək istəyirəm
ayrılığın əyninə.
Geyinmir ki...

Gecə dörddü...
Pəncərəmin yenə vurur ürəyi!
Yenə tərdən islanıb evimizin kürəyi...

...Üşüyür bazar günü,
yanaqları göynəyir.
Sən bilmərsən, ağır dərddi...

Səhər yeddi...
Oyanır küçəmiz də yuxudan.
O kim idi,
səhər ertə dan yerini qorxudan?!

Yenə kimdi
dua-dua göy üzünü ağrıdan –
durammadı, çıxıb getdi?!.

Tural Turan