Onews.az şair Paşa Talıblının şeirlərini təqdim edir:

***
Tapdadı içimi atlı qarışqa,
tapmadı içimi adlı qarışqa -
Qağayı burnutək duzlaşıb içim.

Göylərə yaraşır elə göy adı...
Mənim şeirlərim elegiyadı,
mənim şeirlərim başsağlığıdı.

Öldü, sevə-sevə barama qurdu -
bəxtəvər başına, barama qurdu,
bəxtəvər başına - hazır evin var.

Göynədir kafamı buz kimi sürgün...
Adsız şairləri qabaqda bir gün
atsız yəhərlərin günü gözləyir.


Sular tez axır demişkən...

... sular tez axır- demişkən,
gözümdən yaşı neylədin?
Üzümü suya çəkərdi
ya uzaqbaşı... neylədin?

... öldü bitər, diri bitməz,
biri bitər, biri bitməz.
Yürüdükcə yürü, bitməz...
Dolduqca boşu, neylədin?

Könlümün başı... könlümün
göyərməz daşı, könlümün!
Neylədin, naşı könlümü,
neylədin naşı, neylədin?


Bəlkə ona görə qaranəfəsəm...

... yuyub aparacaq məni göz yaşı,
bir bulud ağlayır üzümün üstə.
Qaranəfəs bir söz yürüsə necə?
Dilimin altından gözümün üstə!

Dilimin altından qaragün bir söz
böyüyən alnıma yürüyür elə...
Üzüm börü-börü bozarır, baskak,
gözüm damcı-damcı əriyir elə.

Bəlkə ona görə qaranəfəsəm,
hər gün keçirirəm sözü bərədən.
Dilimin altından gözümün üstə -
mən bu aralıqda... Tanrı nerədə?


Alnımız köhnəlir, yavrum..

... daş kitabələr də demir-
nədir bu alın yazısı.
Tanrının bu başıaçıq,
ayağı yalın yazısı.

Yox, yazıya şəkk eləmə!..
Şəksiz düşmür, şəkkə şükür!
Yəqin tanrı yazanlardı,
alnımıza şəkli düşür...

Xətti də qədimdən gəlir,
dərindir kökləri, yavrum.
Yazısı yenə oxunur,
alnımız köhnəlir, yavrum.

Paşa Talıblı
Azərbaycan Yazıçılar Birliyinin üzvü