Onews.az şair Paşa Talıblının yeni şeirlərini təqdim edir:


Bu payız hicrətdə qaldım...

... hansı suyu xatırlayım,
yadıma bərə düşməsin.
Necə tutum bu dünyanı,
əlimdən yerə düşməsin...

... gülü görüm güllələnsin,
gülü gillə qarışdırdım.
Yanmaq məni kül elədi,
odu küllə qarışdırdım.

Əlnən tutulmur qəriblik,
dilnən deyilmir heç dərd də!..
... dağdöşü, dağdibi uzaq,
qaldım bu payız hicrətdə.

Necə tutum, dağılmasın...
Ucu bir qulac... altı nə?
Hara qoyum bu dünyanı?
Sığarmı ağac altına?..


Peyğəmbərçiçəyi...

Bu da peyğəmbərçiçəyi...
... qəmər, günün gerçəyini -
dərib sənə göndərirəm
güllərin ən göyçəyini.

Yoldumu - ağarır, qəmər?
O nədi qızır... dandımı?
Səni saxlayan göylərin
dirəyi qızıldandımı?..

Suyu da qızıldandımı?
Sən çəkən arxa su gəlir...
... əzabdı arxa dönənim,
min ildi arxası gəlir.

Bu da qızıl mədənləri...
Mədəni tədarükmü var?
... bilməmişəm, bəxtəvərəm,
sevgidən ağır yükmü var?

Lap "Gülüstani-İrəm" olsun,
gül varmı, gündə dərilən?
Bir peyğəmbərçiçəyi var,
dərib sənə göndərirəm!


Adsız məbəddəki şam...

Mənim dostum gecə, düşmənim gecə!
Dərdi lağım-lağım atıram, ay dost!
Üfürsən yıxılan filfilə cannan
gecə ayaqüstdə yatıram, ay dost!

Adsız məbəddəki şam da yiyəsiz...
Birdən xatırladım... altdan keç indi!
Üstündə tanrısız Tanrılar gəzir,
gecələrin altı kimin üçündü?

Adlı gecələrdən keçib gedirəm...
Bax, bu gecənin də keçəni atlı!
Gecəqondularda şer yazıram,
cəzamdı bir uzun gecənin altı!

Budu... altı boşdu bu gecənin də -
nə bir ölü vətən, nə bir yol keçən!
Lağım-lağım oldum, atıldım, ay dost,
mənim dostum gecə, düşmənim gecə!..


İnvizaya çatdım...

Bir ixlasa, eşqə vardım,
dəryaları daşan gördüm.
Az yürüdüm, ya gec gəldim?
Halımı pərişan gördüm...

... üçə... beşə - saya çatdım;
vaxtı saya-saya çatdım!..
Gəldim invizaya çatdım,
ac könlümü şan-şan gördüm...

Yolçu yoxsa, yol olamaz...
... sağ olmasa sol olamaz!
... şah doğulan qul olamaz,
sultanıymış Paşam gördüm.


Payız rəngində od...

... qanadsız uçmaq olsaydı,
bir qanadlı quş olmazdı.
... divarları daş olmasa
qəsrlər də boş olmazdı.

... ağaclar yürüyə bilsə
yol olardılar, ağac yox.
... ümid var yara sağalsın,
unudulmağa əlac yox.

Nə yaxşı ömür var hələ...
Payız rəngində od durur.
Bu yağan yağışlar mənə
göy üzünü unutdurur...

Paşa Talıblı