"Təəssüflər olsun ki, Venesiya Komissiyası bizə hüquqi əsaslandırma əvəzinə siyasi qərəzli qiymət verdi, burada faktlar təhrif olunur".

Onews.az xəbər verir ki, bu sözləri hakim "Gürcü Arzusu" partiyasının Baş katibi, Tbilisi meri Kaxa Kaladze qəbul edilmiş "Xarici təsirin şəffaflığı haqqında" qanun layihəsi ilə bağlı Venesiya Komissiyasının rəyini şərh edərkən deyib.

O, Tbilisi Şəhər Şurasının bugünkü iclasında qeyd edib ki, Gürcüstan əhalisi Venesiya Komissiyasından əsaslandırılmış, peşəkar mülahizə və konkret arqumentlər gözləyirdi, lakin bunun əvəzinə konkret qruplardan siyasi mesajlar alınıb:

“Dünən Venesiya Komissiyasının rəyi dərc olundu, bu, yalnız bir şeyi təsdiqləyir, şəffaflıq qanununa qarşı heç bir hüquqi və ya digər arqumentlər yoxdur. Təəssüf ki, Venesiya Komissiyası bizə hüquqi əsaslandırma əvəzinə, faktları təhrif edən siyasi qərəzli qiymət verdi və qanunun geri çağırılmalı olduğunu bildirdi. Bununla belə, o, hüquqi əsaslandırma və ya əsaslı dəlil gətirməyi zəruri hesab etməyib. Venesiya Komissiyası tövsiyə ilə çıxış edir ki, Gürcüstan QHT-lərin və medianın şəffaflığını tələb etməməlidir, belə çıxır ki, bütün bunlar qeyri-demokratik hərəkətdir. Dərc edilmiş sözügedən nəticə yalnız siyasi mesajlarla doldurulmuşdu və heç bir hüquqi qeyd, məzmun müzakirəsi və şəffaflığın niyə pis olmasının izahı yoxdur”, - deyə Kaxa Kaladze qeyd edib.

Məlumat üçün bildirək ki, ötən gün Venesiya Komissiyası Gürcüstanda “Xarici təsirin şəffaflığı haqqında” qanun layihəsi ilə bağlı təcili rəyini dərc edib. Komissiyanın rəyində bu qanunun hazırkı formada geri götürülməsi tövsiyə edilir.

Rauf