"Zəngəzur dəhlizinin açılması ilə bağlı Ermənistana təzyiq edə biləcək ölkələrin sayı bundan sonra daha da artacaq. Çünki bu dəhlizin açılmasını Azərbaycan və Türkiyə ilə yanaşı, Orta Asiya dövlətləri, eləcə də Uzaq Şerqdəki iri ticarət tərəfdaşlarımız da istəyir. Hətta dəhlizin açıqlamasında ən çox maraqlı olan dövlətlərdən biri də Çindir. Pekin Londona qədər uzanacaq"Bir kəmər-bir yol" layihəsinin əsas katalizatorlarındandır".

Bunu Onews.az-a açıqlamasında V çağırış Milli Məclisin deputatı, politoloq Sona Əliyeva deyib.

Keçmiş millət vəkili bildirib ki, Zəngəzur dəhlizinin açılması tarixi zərurətdir:

"Son vaxtlar biz Qazaxıstanın Azərbaycan və Ermənistan arasındakı münasibətlərin normallaşmasında böyük səylər göstərməsinin şahidi oluruq. Özbəkistan və Qırğızıstan da gələcəkdə yeni təşəbbüslərlə çıxış edə bilər.Bu ölkələrin əksəriyyəti Kollektiv Təhlükəsizlik Müqaviləsi Təşkilatında, Avrasiya Gömrük İttifaqında Ermənistanla müttəfiqdirlər. Hətta Belarusla Rusiya da Zəngəzur dəhlizinin açılmasında maraqlı olan ölkələrdəndir. Maraqlı tərəflərin sayı artdıqca İrəvana təzyiq edənlərin sayı çoxalacaq. İrəvanın isə bu cür işgüzar təzyiqlərin qarşısında duruş gətirəcək gücü yoxdur. Ermənistan bundan sonrakı layihələrdən kənarda qalmaq istəmir. Ona görə də gec-tez Azərbaycanın şərtlərini qəbul edəcək".

Fuad Süleyman