"Hazırda Ermənistanın gələcəyi Qərbin yox, Rusiyanın əlindədir. Çünki baş nazir Nikol Paşinyan köksüz fiqurdur. Zənnimcə, qarşıdakı aylarda İrəvanda vəziyyət daha da kəskinləşə bilər. Bu, İrəvandakı hakimiyyətin radikal gedişlərinə bağlı məsələdir".

Bunu Onews.az-a açıqlamasında V çağırış Milli Məclisin deputatı, politoloq Sona Əliyeva deyib.

Keçmiş millət vəkili bildirib ki, əgər Paşinyan Rusiyadan kəskin və sürətli uzaqlaşma qərarı alarsa, sözdə deyil, əməldə bunu reallaşdırarsa, o zaman Kremlin addımları daha sərt olacaq:

"Söhbət baş nazirin fiziki məhvi ilə yanaşı, 102-ci ordunun Gümrüdən İrəvana yeridilməsi kimi nüanslardan gedir. Hətta hazırda pusquda gözləyən erməni generallar da hərəkətə keçə və Kremlin göstərişlərini hərfbəhərf yerinə yetirə bilərlər. Digər tərəfdən, Ermənistanda ikinci inqilabın zamanı yetişməyib. Xalq artıq savaşdan və müharibə vəziyyətindən, yersiz itkilərdən bezib. Ona görə də Nikol Vovayeviçin gedişlərinə səbrlə dözür. Qərb isə Ermənistandan Rusiyanı birdəfəlik çıxarmaqla bağlı radikal addımlar atmağa tələsmir. Ona görə Paşinyan da ehtiyatlı davranır. Paşinyanın rəqibləri isə güclü fiqurlar deyil. Eloktaratı və gücləri bir o qədər yoxdur. Hətta Paşinyanın sinif yoldaşı Vahe Qazaryan da bundan sonrakı proseslər üçün bir o qədər ümidli deyil. Son sözü nə Qərb, nə də Ermənistan deyəcək. Həmişə olduğu kimi İrəvanla bağlı son söz yenə də Kremlindir".

Fuad Süleyman