"Dünən Tbilisidə gördüklərimiz qətiyyən qəbuledilməzdir, bu, dostluq deyil, birbaşa düşmənçilikdir".

Onews.az xəbər verir ki, bu sözləri “Gürcü arzusu”nun baş katibi Kaxa Kaladze avropalı deputatların 11 noyabr etiraz mitinqində iştiraklarını şərh edərkən deyib.

Onun sözlərinə görə, avropalı tərəfdaşlar Gürcüstan dövlətçiliyini təhqir edir və suverenliyə hörmət etmirlər:

“Bu, bir daha sübut edir ki, həmin şəxslər Gürcüstan dövlətçiliyini təhqir edir, ölkənin suverenliyinə və müstəqilliyinə hörmət etmir. Bu cür bəyanatlar və hərəkətlər son bir neçə aydır və illərdir ki, açıq danışdığımız mövqeyi təsdiqləyir. Məhz bu münasibət hər bir ləyaqətli gürcü üçün tamamilə qəbuledilməzdir.

Bunlar vətən sevgisi olmayan şəxslərdir – ölkə daxilində də belə şəxslər var ki, Gürcüstan onlar üçün sadəcə bir ərazidir. Lakin ölkədə çoxluq üçün Gürcüstan doğulduqları, böyüdükləri, sevdikləri və seçimlərini seçkidə təsdiq etdikləri vətəndir. Dünən gördüyümüz şey tamamilə qəbuledilməzdir. Bu, dostluq deyil, bu, birbaşa düşmənçilikdir. Bu, insanları bir-birinə qarşı qoymaq, cəmiyyəti bölmək üçün birbaşa çağırışlardır, hər şeyə öz adı ilə yanaşmalıyıq" , - deyə Kaxa Kaladze qeyd edib.

Məlumat üçün bildirək ki, dünən, noyabrın 11-də parlamentin önündə “Biz Avropayıq” şüarı ilə etiraz aksiyası keçirilib. Gürcüstanda səfərdə olan Aİ-nin 8 ölkəsinin Xarici İşlər Komitəsinin sədrləri isə burada toplaşan ictimaiyyət qarşısında çıxış edib.

Elgiz Məmməd