"Ölkəmizdə akkreditə olunmuş səfirlərdən xahiş edərdim ki, “Gürcü arzusu”na manipulyasiya və spekulyasiya etməyə imkan verməmək üçün 11-ci çağırış parlamentin ilk iclasında iştirak etməsinlər”.

Onews.az xəbər verir ki, bu barədə “Gürcüstan üçün” partiyasının lideri Giorgi Qaxaria mətbuat konfransında bildirib.

Eyni zamanda, Qaxaria Gürcüstan vətəndaşlarına və tərəfdarlarına çağırış edərək, parlamentin ilk iclasının keçiriləcəyi gün hərkəsi hazırkı hakimiyyətə etiraz səsini ucaltmağa çağırıb:

“Mən Gürcüstanda akkreditə olunmuş diplomatik korpusa müraciət etmək istəyirəm. İlk növbədə Amerika Birləşmiş Ştatlarının səfirinə və Avropa İttifaqına üzv dövlətlərin səfirlərinə. Sizdən xahiş etmək istərdim ki, Gürcüstan vətəndaşlarının birlikdə seçkilərdə iştirakının mahiyyətini, məzmununu və mənasını qoruyasınız. Həmçinin, Gürcüstanda hökumətin dinc yolla dəyişməsi üçün əsas demokratik institut kimi seçkilərin məzmununu və mənasını birlikdə qoruyaq. Bildiyiniz kimi, bu gün Gürcüstan küçələrində on minlərlə Gürcüstan vətəndaşı oğurlanmış səslərə və seçkilərin nəticələrinə etiraz edir. Necə ki, bizim strateji tərəfdaşlarımız, sizin dövlətlərin və Avropa İttifaqının rəhbərləri seçkiləri legitimləşdirmək üçün tam müstəqil araşdırmanın zəruri olduğunu deyirlər. Bu arqumentlərə əsaslanaraq, sizdən xahiş edirəm ki, 11-ci çağırış parlamentin ilk iclasında iştirak etməyəsiniz və bununla da Gürcüstan vətəndaşlarının iradəsini qoruyasınız ki, sonrakı seçkilər oğurlanmasın. Gəlin, Gürcüstan vətəndaşlarının istəklərini seçkilər vasitəsilə qoruyaq və demokratik ölkədə olduğu kimi, hökuməti dinc yolla dəyişmək imkanı əldə edək”, - deyə partiya lideri vurğulayıb.

Qaxarianın sözlərinə görə, 26 oktyabr 2024-cü il seçkiləri sistemli şəkildə saxtalaşdırılıb.

Rauf