Gürcüstanda hakim "Gürcü Arzusu“ partiyasının sədri İrakli Qaribaşvili komandasını tərk etməsi ilə bağlı mətbuatda yayılan məlumatlara aydınlıq gətirib.

Onews.az xəbər verir ki, "Rustavi2" telekanalına müsahibə verən Qaribaşvili qeyd edib ki, sözügedən məlumatlar yalan və böhtandır.

İrakli Qaribaşvili öz qaydalarının olduğunu və heç vaxt ondan dönməyəcəyini qeyd edib:

"Son günlər ictimaiyyətin gördüyü bu absurd böhtanlara, ittihamlara və bu yalana cavab vermək istəyirəm. Yadınızdadırsa daha öncə də, mətbuatda yayıldı ki, guya mən etiraz əlaməti olaraq partiyanı tərk etmişəm, komandanı tərk etmişəm, bir şeyləri etiraz etmişəm, xüsusilə də böhran dövründə, guya ölkəmizin qarşısında böyük çağırışlar olduğu bir vaxtda partiyanı tərk etmişəm. Bu, absurddur. Məni tanıyan hər kəs yaxşı bilir ki, bu, mənim xarakterim deyil. Mənim öz qaydalarım, prinsiplərim var. Bu qaydalarla bütün həyatımı yaşamışam və əlbəttə ki, bu qaydalardan heç vaxt dönməyəcəyəm".

Bundan başqa, o, klinikaya yerləşdirilməsi ilə bağlı yayılan xəbərlərə də aydınlıq gətirib:

“Mən absurd, iyrənc yalana da toxunmaq istərdim. Bunu deməkdən çəkinməyəcəyəm, satqın Baçiaşvili və onun oxşarı Qaxariya. Bilirsən, mən utanıram... hər kəsin həkimə getməyə ehtiyacı ola bilər. Məşq zamanı çox kiçik zədə aldım və onlar isə böyük qalmaqal və iyrənc təhqiramiz yalanlar uydurdular. Ona görə də sizə xülasə şəklində desəm, bütün bunlar çox böyük yalandır”, – deyə Qaribaşvili bildirib.

Məlumat üçün bildirək ki, ötən gün mətbuatda yayılan məlumatlarda iddia olunurdu ki, "Gürcü Arzusu"nda daxili qarşıdurma baş verib və nəticədə Qaribaşvili xəsarətlər alıb.

Elgiz M.