“Son günlər Ermənistan tərəfindən Azərbaycanın mövqelərinə ardıcıl təxribatlar həyata keçirilir. Bu təxribatlar sülh sazişi prosesinin davam etdiyi bir zaman kəsiyində baş verir. Eyni zamanda, ermənilərin cəbhə xəttindəki təxribatları Azərbaycan təyyarəsinin qəzaya uğramasından və rus hərbçilərinin İran-Ermənistan sərhədindən geri çəkildiyi bir dövrdə gerçəkləşir. Bütün bunlar bir qəribəlik təşkil edir və ortaya cavabsız sualların çıxmasına səbəb olur”.

Bunu Onews.az-a açıqlamasında Türkiyə Ordusunun ehtiyatda olan generalı, hərbi ekspert Yücel Karauz deyib.
Ehtiyatda olan general-mayorun sözlərinə görə, sülh sazişinin detallarının müzakirə edildiyi bir vaxtda belə bir təribatların baş verməsinin iki-üç ana xətti var:

“Bunun birincisi xarici səbəblərdir. Ermənistandakı əli qanlı qatillər, keçmiş klanlar daxildəki mövcud çəkişmələri bəhanə edərək keçmiş sahiblərinə arxalanaraq onlara olan sadiqliyini nümayiş etdirirlər. Həmin təxribatçı qüvvələrin sahibləri də zaman-zaman dəyişir. Bəzən bunlar Rusiya, bəzən də İran ola bilir. Çünki ortada Cənubi Qafqaza, bu bölgəyə sülhün, əmin-amanlığın gəlməsini istəməyən İran var. Rusiya da gah bölgəyə sülh gəlməsini istəyir, bəzən də bunun əksini edir. Dolayı yolla desək, bu iki xüsus bölgədəki hadisələrin xarakterinə öz təsirlərini göstərə bilir. Bu, ikinci faktordur. Üçüncüsü isə Qərbin və Avropadakı erməni lobbisinin Ermənistandakı uzantılarıdır. Güney Qafqazda gərginliyi saxlamaqla BMT və Avropa Komissiyasının missiyasını orada qalmasını təmin etməyə çalışırlar. Bu, yavaş-yavaş Qərbin Cənubi Qafqaza giriş cəhdləridir. Azərbaycan dövləti öz ərazi bütövlüyünü qorumağa müqtədirdir. Sərhəd təxribatlarının genişmiqyaslı əməliyyatlara çevriləcəyi indiki məqamda indandırıcı görünmür. Amma bu təxribatlar müəyyən proseslərə hazırlıqdır. Ermənistan tərəfinin bu cür təxribatlarla bir sıra proseslərə hazırlaşdığını deyə bilərik”.

Turan