"Türkiyə təkcə öz sərhədləri daxilində deyil, ümumilikdə bütün sərhəd zolağında, qonşuluğunda onun milli təhlükəsizliyinə qarşı təhdid yaradan bütün terrorçu və separatçı birliklərin zərərsizləşdirilməsini öz qarşısına məqsəd qoyub".

Bunu Onews.az-a açıqlamasında siyasi şərhçi Tural Turan deyib.

Ekspertin sözlərinə görə, hazırda Ankara bütün diqqətini Şimali İraqda və Suriyada fəaliyyət göstərən terror qruplarının neytrallaşdırılmasına yönəldib:

"Artıq PKK və YPG terror təşkilatları son həftələrini, bəlkə də günlərini yaşayır. Son bit il ərzində Türk Ordusu onlara qarşı öldürücü zərbələr endirib. Türkiyə cənub sərhədlərini terrorun qalıntılarından təmizlədikdən sonra diqqətini şərqdəki qonşuluğuna yönəldə bilər. Burada erməni ekstremizi yenidən baş qaldırmaqdadır. Hətta erməni terror təşkilatları ara-sıra Türkiyə və Azərbaycanı hədəf alan bəyanatlar verirlər. Təbii ki, Ankara hələ ki, onlara istədiyi cavabı verməyə tələsmir. Zamanı yetişincə Azərbaycanla Türkiyə Ermənistandakı həmin radikal silahlı terror qruplaşmalarına lazımı cavabı verəcək, indi Ankara cənub sərhədlərinin terrordan arınmasına köklənib".

Rauf Süleymanov