"Çox güman ki, Suriyadan sonrakı hədəf və qurban İraqdır. Qərbin Yaxın Şərqdəki proksi qüvvələri bu dəfə İraqda yeni qan çanağı yaradacaq. Məqsəd Suriyada olduğu kimi İraqdan da İranın maliyyələşdirdiyi silahlı qruplaşmaları təmizləməkdir. Eyni zamanda, İsrail və ABŞ ən qısa müddətdə İrana məxsus bütün silahlı birləşmələrin İraqdan da ilişiyini kəsməyə çalışacaq".

Bunu Onews.az-a açıqlamasında siyasi şərhçi Tural Turan deyib.

Ekspertin fikrincə, Suriyadakı hadisələrin və Əsəd rejiminin devrilməsinin arxasında da İranın Yaxın Şərqdəki bütün bağlarının qoparılması dayanırdı:

"Qərb Suriyada Rusiya və İranın nüfuzuna ciddi zərbə vurdu. İraqda isə zərbə altında qalan yalnız İran tərəfi olacaq. Livan, Suriya, İraq üçbucağından sonra Qərb koalisiyası yönünü çox güman ki, Yəmənə dəyişəcək. ABŞ və İsrail Yəməndəki İran proksilərini neytrallaşdırdıqdan sonra İsrail üçün Yaxın Şərqdə ciddi təhlükə qalmayacaq. Çox güman ki, gələn ilin ilk həftələrindən savaşın alovu İran sərhədlərinin içərilərinə doğru yayılacaq. İndi Tehrandakı molla hökuməti hər vəchlə İraqda vaxt udmağa və gücünü daxildəki müharibə üçün səfərbər etməyə çalışacaq. Suriyadan fərqli olaraq İraqda zərbənin əsas hədəfi radikal İran proksiləridir. "Hizbullah" və "HƏMAS"-ın Suriyadan İraqa sığınan qalıqları, eləcə də Qüds komandanlığının Suriyada silahlarını atıb ayaqyalın Kərbəlaya qaçan qalıqları da elə İraq-İran sərhədində zərərsizləşdiriləcək. Hadisələrin gedişatı və bütün oxlar Suriyadan sonra İraqı göstərir".

Banu Murad