"Düşünürəm ki, Bəşər Əsəd rejiminin devrilməsindən sonra da Suriyada heç nə dəyişməyəcək. Çünki Suriya hələ də dünyadakı əsas oyunçuların bir-birlərinə əzələ nümayiş etdirəcəyi əsas cazibə mərkəzlərindəndir".


Bunu Onews.az-a açıqlamasında siyasi şərhçi Tural Turan deyib.

Ekspertin yanaşmasına görə, qarşıdakı onilliklərdə də belə olacaq:

"Fikrimcə, Türkiyənin və Türk dünyasının Suriyadakı əsas geostrateji maraqlarından birincisi Suriya və İraqda Türkməneli Cumhuriyyətinin yaradılmasıdır. Ankara əsas oyunçu kimi bölgədə mövqeyini daha da artırmaq istəyirsə, mütləq şəkildə Türkməneli kartından istifadə etməlidir. Yəni təcili şəkildə Türkməneli Cümhuriyyəti qurulmalıdır. Suriyanın ərazi bütövlüyünə heç suriyalıların özləri hörmət etmirlər. Colani və onunla indiki proseslərdə müttəfiq olan qruplaşmaların hamısı terror çətirinin altından çıxıblar. Bu adamların dövlət və dövlətçilik şüru yoxdur. Verilən vədlər də müvəqqətidir. Əsəd rejimini qısa müddətdə devirmək İranı və onun proksi güclərini bölgədən vurub çıxarmaq üçündür. Yəni, "təhrirçilər" ABŞ-ın "xeyir-duası" ilə yuvalarından çıxıb Əsədin üzərinə yeridilər".

Tural Turan düşünür ki, daha sonra İran İraqdan da geri çəkilməyə məcbur ediləcək:

"Bölgədə əsas oyunçu hələ də ABŞ və İsraildir. Bir müddət sonra onlar Türkiyəyə qarşı "PKK-PYD kartı"nı işə salacaqlar. Yəni İrandan sonrakı hədəf Türkiyə ola bilər. Belə olan halda İraq və Suriyadakı türkmənlərin başı böyük bəlalar çəkəcək. 2014-cü ildə türkmənlərə qarşı soyqırımı aktlarının şahidi olduq. Həmin acı tendensiyalar yenidən təkrarlanmamaılıdır. ABŞ və İsrail Suriyanın ərazi bütövlüyü anlayışına heç vaxt məhəl qoymayıb. Bundan sonra da Suriyanın ərazi bütövlüyü bərpa edilməyəcək. Ona görə də Türkiyə və Türk dünyası cəld tərpənməli, Suriyadakı soydaşlarımızı təşkilatlandırmalıdırlar. Türkiyənin Suriyada qalması da Türkməneli Cümhuriyyətinin mövcudluğundan asılı olacaq. Suriyanı yenidən qurmaq üçün inşaat işlərinin Türkiyəyə tapşırılması və ya Ankaranın bu gəlhagəldə ancaq iqtisadi maraqlar güdməsi onun geostrateji gücünə böyük üstünlüklər qazandırmayacaq. Tutunacaq yer üçün Türkməneli Cümhuriyyətinin bünövrəsi elə bugünlərdə atılmalıdır".

Banu Murad