Jalə Həsənova,
Azərbaycan Respublikası Əmək və Əhalinin Sosial müdafiəsi Nazirliyinin tabeliyində Sosial Xidmətlər Agentliyinin 1 nömrəli Uşaq Reabilitasiya Mərkəzinin direktoru

Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin Partiyanın VIII Qurultayında çıxışı ölkəmizin qazandığı tarixi nailiyyətlərin qiymətləndirilməsi və gələcək hədəflərin müəyyənləşdirilməsi baxımından mühüm əhəmiyyət daşıyır. Çıxışda səsləndirilən fikirlər Azərbaycanın müstəqil siyasətinin, milli maraqlara əsaslanan inkişaf strategiyasının və xalq–iqtidar birliyinin əhəmiyyətini bir daha nümayiş etdirir.

Yeni Azərbaycan Partiyasının yaranması ölkəmizin mürəkkəb tarixi dövründə xalqın güclü dövlətçilik iradəsinin ifadəsi olmuşdur. Ulu Öndər Heydər Əliyevin rəhbərliyi ilə formalaşan siyasi ənənələr müstəqil Azərbaycanın qorunmasına, sabitliyin təmin edilməsinə və dövlət institutlarının möhkəmləndirilməsinə mühüm töhfə vermişdir. Bu gün həmin ənənələr Prezident İlham Əliyevin rəhbərliyi ilə yeni dövrün çağırışlarına uyğun şəkildə davam etdirilir.
Azərbaycanın ərazi bütövlüyünün və suverenliyinin tam bərpası xalqımızın tarixində xüsusi yer tutan hadisədir. Bu qələbə milli iradəmizin, siyasi qətiyyətimizin və birliyimizin nəticəsidir. Dövlətimizin əldə etdiyi uğurlar göstərir ki, milli məqsədlər ətrafında birləşən xalq qarşısına qoyduğu strateji hədəflərə nail olmaq gücünə malikdir.

Qurultayda diqqət yetirilən mühüm məsələlərdən biri də ideoloji təhlükəsizliyin qorunmasıdır. Qloballaşan dünyada informasiya təsirlərinin artdığı bir şəraitdə milli-mənəvi dəyərlərimizin qorunması, gənclərin vətənpərvərlik ruhunda tərbiyəsi və cəmiyyətin maarifləndirilməsi xüsusi aktuallıq kəsb edir. Bu istiqamətdə partiya təşkilatlarının üzərinə mühüm vəzifələr düşür. İctimaiyyətlə düzgün ünsiyyətin qurulması, dövlətimizin nailiyyətlərinin obyektiv şəkildə çatdırılması və vətəndaş fəallığının artırılması ideoloji işin əsas istiqamətlərindən olmalıdır.
Ölkəmizdə həyata keçirilən iqtisadi və sosial islahatlar, müdafiə potensialının gücləndirilməsi, beynəlxalq əlaqələrin genişləndirilməsi Azərbaycanın dayanıqlı inkişafına xidmət edir. Qarabağ və Şərqi Zəngəzurda aparılan bərpa işləri, Böyük Qayıdış Proqramının icrası isə dövlətimizin öz vətəndaşlarına göstərdiyi diqqət və qayğının mühüm təzahürüdür.
Hesab edirəm ki, Yeni Azərbaycan Partiyasının VIII Qurultayında müəyyənləşdirilən vəzifələr hər bir partiya üzvündən məsuliyyətli mövqe, fəallıq və yüksək vətəndaşlıq mövqeyi tələb edir, əsas məqsədimiz dövlətçilik prinsiplərinə sadiq qalmaq.
İnanıram ki, xalqımızın birliyi, dövlətimizin gücü və Prezident İlham Əliyevin rəhbərliyi ilə Azərbaycan qarşıdakı illərdə də mühüm nailiyyətlər əldə edəcək, müstəqilliyini və beynəlxalq nüfuzunu daha da möhkəmləndirəcəkdir.
Azərbaycanın gələcəyi milli birliyimizdə, güclü dövlətçiliyimizdə və ümumi məqsədlər naminə birgə fəaliyyətimizdədir.