Türkiyə öz sərhədləri daxilində, eləcə də qonşuluğunda terroru bitirməkdə qərarlıdır. Buna görə də həm hərbi, həm də diplomatik masada Ankara qollarını çırmalayıb.

Terrorun aktiv qanadlarını zərərsizləşdirib blokladıqdan sonra diplomatik kanallarla əlindəki kartların üstünlüklərindən yararlanmağa çalışır. Qardaş ölkə PKK və PYD birləşmələrini bitirmək üçün ilk olaraq onları dəstəkləyən müttəfiqi Birləşmiş Ştatları razı salmağı bacardı.

Bunun üçün ilk olaraq Şimali İraqda və Suriyada kürd kökənli terrorçuları və separatçıları ağır yenilgiyə uğratdı. Daha sonra Öcalan və Demirtaş kartlarından istifadə etmək üçün hərəkətə keçdi. İmralı həbsxanasına dərin dövlətin yetkililəri göndərildi. 26 ildir dəmir barmaqlıqlar arasında olan baş terrorçu razı salındı. Ardınca HDP-nin həmsədri olan Selahettin Demirtaş da bu prosesə qoşuldu.

Hər qrup öz siyasi və “hərbi” dəstəkçilərinə mesaj yolladı. Əslində həbsdəki “liderləri” tərəfindən göndərilən mesajların hamısında reallıq əks olunmuşdu; təslim olmasanız, terror təşkilatınızı buraxdığınızı elan eləməsəniz məhv ediləcəksiniz. Əgər təslim olsanız, siyasi mübarizənizi davam etdirməyə başlaya bilərsiniz – mesajı verildi. Cumhur İttifaqının bu projesi 47 illik bir qara yaranı kökündən qazımağa hesablanıb. Təbii ki, plan ölkə başçısı Ərdoğanın və MHP rəhbəri Dövlət Baxçalınındır. Amma Demirtaşla və Öcalanla telefon xətti ilə görüşən Türkiyə dərin dövlətinin aparıcı simalarından olan Dövlət bəydir. PKK və PYD artıq ilkin mərhələni icra etdiklərini açıqladılar. Yəni, atəşkəs elan olundu. Bundan sonrakı proseslərdə siyasi müzakirə və məsləhətləşmələr aparılacaq. Keçmişləri qaranlıq olan kürd əsilli siyasətçilərə siyasi səhnədə işıqlı sabahlar vəd oluncaq. Beləliklə, qan və terror küləkləri regionda əsməyəcək. Türkiyə 2071 hədəflərinə doğu maneəsiz addımlamaq istəyir. Bunun üçün ilk növbədə ən böyük problem həll edilməli idi. Söhbət separatizmin kökünün tam kəsilməsindən gedir. Artıq ciddi irəliləyişlər də əldə olunmaqdadır. Bundan sonrakı hədəf isə FETÖ terror qruplaşmasına qarşı olacaq.

Ankara ölkənin hər yerində yekun təmizləmə əməliyyatlarına yaşıl işıq yandıracaq. Bu probelm də tam həllini taparsa, o zaman yaxın onilliklərdə qardaş ölkə kosmik sənaye və nüvə dövlətinə çevriləcək. Böyük problemləri olan dövlətlər nüvə dövlətinə çevrilə bilmirlər.

Gözümüzün önündə İran nümunəsi var. Hələ də nüvə dövlətinə çevrilməkdə böyük çətinliklər yaşayır. Çünki daxildə çox ciddi problemləri mövcuddur. Nüvə dövləti olmaq üçün ilk növbədə iqtisadi amplituda normallaşdırılmalıdır.

Türkiyə də terrorun kökünün kəsilməsinə yönəldilən milyardlarla dollarlıq büdcəni daha sağlam, daha gəlirli sahələrə yatırmaq istəyir. Çünki 2071 hədəflərinə çatmaqda israrlıdır.