Rusiya Azərbaycana qarşı imperialist siyasətini dəyişmək istəmir. Bakı Kremlin gözündə hələ də "əski müstəmləkə, əyalət şəhəri" kimi görünür. Amma vəziyyət bir qədər də uzansa, Rusiya Azərbaycan kimi etibarlı tərəfdaşı itirə bilər.

Görünən odur ki, Rusiya keçmiş SSRİ respublikalarına öz baxışını son otuz ildə dəyişməyib. Əgər AZAL-ın təyyarəsinin vurulmasına görə, Moskva Bakıdan üzr istəməsə, Azərbaycan Rusiyaya daha sərt təpki verəcək. 22 fevral 2022-ci ildə iki ölkə arasında imzalanmış müttəfiqlik və tərəfdaşlıq bəyannaməsini Azərbaycan parlamenti ratifikasiya etməyəcək.

Bu məsələdə itirən tərəf yenə də Rusiya olacaq. Çünki Qərbin sanksiyaları fonunda Putin Rusiyası beynəlxalq müstəvidə təklənib. Belarus və Şimali Koreya kimi güclü nüfuzu olmayan ölkələrin dəstəyinə ümid bəsləyir. Azərbaycan isə Şimal-Cənub, Qərb-Şərq marşrutunun tam mərkəzində yerləşir. Üstəlik, Zəngəzur dəhlizinin açılması prosesində Rusiya bütün proseslərdən kənarda qala bilər. Çünki Azərbaycan regionun əsas oyunçularından biridir. Ən əsası, Bakı beynəlxalq müstəvidə bütün addımları Ankara ilə birlikdə atır.

Yəni, regionda indi əsas söz sahibi Türk Birliyidir, Rusiya deyil. Ukrayna savaşının uzanması isə Rusiyanı Güney Qafqazdan bir qədər də uzaqlaşdıracaq. Düşünürəm ki, Kremlin beyin mərkəzləri də bunu çox yaxşı anlayırlar. Onlar çox gecikmədən Cənubi Qafqazın açarı olan Azərbaycandan üzr istəməli və təyyarə qəzasına görə ölkəmizin irəli sürdüyü bütün şərtləri qeyd-şərtsiz qəbul etməlidirlər. Hadisələrin gedişatı göstərir ki, Rusiya imperialist baxışlarından əl çəkmək istəmir və Azərbaycanla keçmiş SSRİ dövründə olduğu kimi rəftara can atır. Bu, Putin Rusiyasının 25 illik dəyişməz və məntiqsiz siyasətinin bir daha təzahürüdür.

Azərbaycan təyyarə qəzası ilə bağlı beynəlxalq məhkəməyə baş vurarsa, oradan bizim lehimizə ədalətli qərar çıxarsa, bu Rusiyanın beynəlxalq müstəvidə nüfuzunu daha da zədələyəcək. Hətta Kremlin mafioz təfəkkür sistemi ilə beynəlxalq siyasət yürütdüyünü ortaya qoyacaq. Bu baxımdan, Kreml Bakıdan üzr istəməyə tələsməlidir.

Sona Əliyeva
V çağırış Milli Məclisin deputatı
Onews.az