O, gürcü əsilli olsa da dünya mediasında Latviya və Azərbaycan jurnalisti kimi tanınırdı.

Onu Azərbaycana gətirən Qarabağda atılan mərmilərin səsi idi.
1959-cu ildə Latviyada doğulsa da, 2017-ci ildə Bakıda, Qurd qapısı qəbristanlığında dəfn olunur.
Azərbaycanda Qarabağ həqiqətlərini dünyaya çatdıran jurnalistlərdəndir.

Onews.az xəbər verir ki, söhbət birinci Qarabağ savaşının əsas söz savaşçılarından olan Tatyana Çaladzedən gedir.

O, vaxtilə "Baltiyskoe vremya", "Atmoda" və "Latviyas layks" qəzetlərində işləyir.
Tatyana Çaladze 1992-1994-cü illərdə Qarabağdan onlarla reportaj hazırlayır.

Azərbaycan həqiqətlərini dünya ictimaiyyətinin diqqətinə çatdırır.
1992-ci ilin sonlarında Qarabağ müharibəsini işıqlandırmaq üçün Azərbaycana gəlir.
Tatyana hətta döyüşlərin gedişində iştirak edir.
Cəbrayıl rayonunun Gecəgözlü kəndində müharibənin düz ortasında çəkiliş aparır.
Ağır döyüşlərin birində qəlpə yarası da alır.

Ermənilər onun jurnalist gödəkcəsində olduğunu görsələr də atəşə tutmuşdular.
Əsgərlərimizdən biri Tatyananın üzərinə atılıb yerə yıxır ki, güllə ona dəyməsin.
Bu zaman hadisələri lentə aldığı fotoaparatı əlindən yerə düşür.
O, canının deyil, həmin görüntülərin məhv olmasından narahat olur.
Hərbçimizə deyir ki, onu buraxsın, fotoaparatı qorusun.

Ağdam cəbhəsində əsgərlərimiz onların şəkillərini çəkməsini istəyir.
Tatyana onların şəkillərini çəkib Latviyaya qayıtmalı olur.
Amma hərbçilərimizə söz verir ki, şəkilləri çıxartdırıb onların özlərinə şəxsən çatdıracaq.
Xanım jurnalist sözünün üstündə durur.

Şəkilləri bir-bir əsgərlərə verməsini özünə borc bilir.
Xocalı hadisələrini faktlar əsasında işıqlandırır.
Baltikyanı ölkələrdəki erməni diasporunu bir neçə dəfə faktlarla susdurur.
Qarabağda tək əllə vuruşan əsgərlərimizdən birini axtarıb tapır.

Ondan müsahibə alır.

Daha sonra onu Latviyaya apararaq əməliyyat etdirir.
Tatyana xanım Natiq Səmədov adlı həmin hərbçinin protez qolla təmin edilməsinə nail olur.

Onun əməliyyat və protez qol xərclərini özü qarşılayır.
O, Ermənistan-Azərbaycan münaqişəsi, eləcə də Azərbaycan və Ermənistan tarixi haqqında bir çox məqalələrin müəllifidir.
Azərbaycan prezidentinin sərəncamı ilə 21 iyul 2010-cu ildə Tatyana Çaladzeyə Əməkdar jurnalist adı verilib.
Azərbaycana sonsuz sevgisi onun dini əqidəsinə də öz təsirini göstərir.

Tatyana xanım birinci Qarabağ savaşından sonra İslam dinini qəbul edir.
Azərbaycana, Bakıya bağlılığı onun birdəfəlik ölkəmizə köçməsi ilə nəticələnir.
Onun "Karabaxskaya oteçestvennaya: oni umirali çestno" kitabı erməni diasporuna ən ağır zərbə kimi qiymətləndirilir.
Çaladze 2017-ci il dekabrın 2-də fani dünya ilə vidalaşır.

O, müsəlman adət-ənənələri ilə dəfn olunmasını vəsiyyət etmişdi.

Dekabrın 3-ü Bakının Yasamal rayonunda "Qurd qapısı" qəbiristanlığında torpağa tapşırılır.