İndi Qərbdə anlayırlar ki, Cənubi Qafqazda yalnız Ermənistana hakim olmaqla Kreml qarşısında heç nə əldə etmək mümkün deyil.

Ona görə də Avropa koalisiyası Gürcüstanda da hər hansı bir yolla hakimiyyəti dəyişib yerinə oyuncaq lider gətirmək istəyir.

Amma indiki halda bu mümkün olmayacaq. Çünki hazırda Qərb cəbhəsində ağzıbirlik yoxdur. Macarıstan, Çexiya, Almaniya kimi ölkələr artıq Moskva ilə kəllə-kəlləyə gəlmək istəmirlər.

Ona görə də düşünürəm ki, Avropa Birliyinin Gürcüstana görə toplantısı heç nəyi dəyişməyəcək. Amma Qərb Gürcüstanda yenə də aranı qatmağa çalışacaq. Terakt və davamlı xaotik aksiyaların olması mümkündür. Çünki Saakaşvili dövründən Gürcüstanda möhkəmlənmiş Qərb missionerlərinin kökünü indiki hakimiyyət tam şəkildə qazıya bilməyib.

Seçki öncəsi hakim partiyanın şansları yenə də yüksəkdir. Tbilisi istisna olmaqla əhali Rusiyaya daha meyilli görünür. Çünki əyalətlərdə yaşayan sadə gürcülərin, meqrellərin və svanların çörəkpulu üçün üz tutduğu ölkə Rusiya, aylıq alış-veriş üçün baş çəkdikləri əsas şəhər Vladiqafqazdır. Yəni, gürcü xalqını Rusiyadan qoparmaq o qədər də asan deyil.

Qərbin araşdırma institutları da bunu yaxşı başa düşürlər.

Fəqət, son 15 ildə Qərb institutları Gürcüstan əhalisini "tərbiyələndirmə" isfiqamətində işləyə bilməyiblər.

Ona görə ki, gürcülər 2008-ci ilin beşgünlük savaşını, prezident Saakaşvilinin Kremlin həmlələri qarşısında qalstukunu çeynədiyini çox yaxşı hələ unutmayıblar.

Yenidən belə bir amansız savaşı yaşamaq istəmirlər. Gürcülər Qərbin Ermənistanı və Ukraynanı hansı duruma saldıqlarını da dərk etməyi bacarırlar.

Sona Əliyeva
V çağırış Milli Məclisin deputatı
Onews.az