"Suriyada Baas partiyasının və baasçıların 61 illik hakimiyyəti başa çatsa da, prezident Bəşər Əsəd devrilsə də Suriyada Əsəd təhlükəsi hələ də qalır".

Bunu Onews.az-a açıqlamasında V çağırış Milli Məclisin deputatı, siyasi şərhçi Sona Əliyeva deyib.

Siyasi ekspert Sona Əliyevanın sözlərinə görə, söhbət Bəşər Əsədin qardaşı Mahir Əsəddən gedir:

"Hələ ki, onun harda olması barədə hər hansı informasiya yoxdur. Son 24 il ərzində ölkənin de-fakto rəhbəri Mahir Əsəd idi. Ordu və digər güc strukturları onun əlində cəmləşmişdi. Zalımlığı, qəddarlığı ilə ad çıxarıb. Onu neytrallaşdırmadan Suriyaya indiki mərhələdə müvəqqəti dinclik gəlməyəcək. Görünür, Rusiya onu da öz qanadları altına alıb. Kreml zamanı gələndə Əsəd kartını Suriya masasına irəli sürəcək. Çox güman ki, Əsəd rejimi tezliklə Moskvada mühacir hökumətini qurmağa başlayacaq. Bu, Kremlin üsyançılarla danışıqlarının nəticəsindən asılı olacaq. Hələ ki, Rusiya Suriya cəbhəsində gözləmə mövqeyindədir. Çox güman ki, Mahir Əsəd də Colanidən qisas və revanş almaq üçün Kremlin üsyançılarla danışıqlarının nəticəsini gözləyir".

Rauf