Gürcüstandakı prezident seçkiləri Qərbin Tbilisidəki son çırpınışlarıdır. 16 dekabrda gürcülər “Qərbin son iliyini” də vuracaq və beləliklə, Gürcüstanın siyasi tarixində yeni mərhələ başlayacaq.

Salome Zurabişvili dəftəri artıq qonşu ölkədə qapanır. Hətta Gürcüstanın xanım prezidenti hakimiyyətdən getmək istəmədiyini, dirəniş göstərəcəyini söyləsə də mövcud qanunvericiliyə əsasən heç nə edə bilməyəcək. Çünki Gürcüstan qanunvericiliyində prezident məhdud səlahiyyətlərə malikdir. Düşünürəm ki, Zurabişvili son həmlə olaraq əhalini küçələrə çıxarmaq üçün gedişlər gedəcək.

Bu da vətəndaşı olduğu Fransanın həmləsidir. Yəni, Paris və Makron hakimiyyəti siyasi şahmat taxtasında “at”ları geri çəkərək “son fil həmləsi” edəcək. Bu da Qərbin Tbilisidəki son intihar həmləsi deməkdir. Yəni, bu vaxta qədərki etirazlar heç nəyi dəyişməyibsə, deməli, bundan sonra da hər hansı bir dəyişiklik baş verməyəcək. Artıq gürcü elitası öz yolunu müəyyənləşdirib.

Gürcülər Kreml xəttini götürürlər. Məsələ odur ki, onlar buna sadəcə məcburdurlar. Abxaziya və Cənubi Osetiya kimi problemləri var. Gürcüstan Qərb yolunu tutsa, hər iki ərazidən birdəfəlik imtina etmək məcburiyyətində qalacaqdı ki, bu da şimal-qərb qonşumuzun suverenliyinə ciddi təhdiddir. Bir sözlə, “Gürcü arzusu” bütün imkanlarını səfərbər edərək indiki mərhələdən Gürcüstanı itkisiz çıxarmaq istəyir. Salome Zurabişvilinin yerinə kimin seçilməsi də bir o qədər önəmli olmayacaq.

Çünki Gürcüstanda əsas söz hökumət başçısınındır, dövlət başçıları qismən simvolik səlahiyyət sahibidirlər. Amma bununla belə, Qərb Gürcüstandan yenə də əl çəkməyəcək. Buranı qarışdırmaq üçün qollarını çırmalayacaq. Ola bilər ki, yaxın günlərdə Qərb yeni iğtişaş planları ilə Gürcüstanda gündəmə gəlsin. Hətta teraktların gerçəkləşməsi də mümkündür.

Düşünürəm ki, bu halda belə Tbilisinin siyasi iradəsinə təsir göstərmək mümkün olmayacaq.

Sona Əliyeva
V çağırış Milli Məclisin deputatı
Onews.az