"Düşünürəm ki, qaqauz türkləri tarixi fürsətdən iatifadə edərək öz dövlətlərini qurmalıdırlar. Hazırda Rusiya da Moldova ilə kəskinləşən münasibətlər zəminində Qaqauz Yeri muxtariyyətinin rəhbərliyinin yanında olduğunu yarımqapalı formada dilə gətirirlər. Hazırda Moldova sərhədləri içərisində qalan qaqauz qardaşlarımız bu tarixi fürsətdən yararlanmalıdırlar".

Bunu Onews.az-a açıqlamasında siyasi şərhçi Tural Turan deyib.

Siyasi təhlilçinin fikrincə, indi Şərqi Avropadakı qardaşlarımız üçün yüz ildə bir ələ düşən fürsət yaxalanıb:

"Qaqauzlar bu fürsəti lazımınca dəyərləndirməlidirlər. Moldova Rumıniyaya birləşmək istəyir. Qaqauz qanunvericiliyinə və 1995-ci ildə Moldova ilə imzalanan anlaşmaya görə o zaman qaqauzlar müstəqilliklərini elan edə bilərlər. Məncə, vaxt itirmək olmaz. Muxtariyyəti milli dövlətçilik insitutuna dəyişməlidirlər. Stepan Topalın qurduğu özgür dövlət yenidən bərpa olunmalıdır. Üstəlik, bu dəfə Rusiya ilə yanaşı, Türkiyə və Türk Dövlətləri Təşkilatı da onların yanında olacaq. Dünyaya açılmaları və təbii sərvətlərindən özgür istifadə üçün real imkanlar yerindəcə dəyərləndirilməlidir. Bu, Türk Dövlətləri Təşkilatının güclənməsi və coğrafiyasının genişlənməsi üçün də tarixi fürsətdir. Görünür, qaqauzlar yetərli beynəlxalq dəstək almadıqlarına görə hələ ki, gözləmə mövqeyi tutublar".

Banu Murad