Dünyanın aparıcı beyin mərkəzlərinin gəldiyi qənaət budur ki, Donald Trampın hakimiyyətə gəlməsindən sonra Birləşmiş Ştatlarla Türkiyə arasındakı münasibətlər bir xeyli normallaşacaq.

Qənaətlərin ümumi məzmunu ondan ibarətdir ki, Donald Tramp NATO-dakı müttəfiqləri ilə münasibətlərinə daha çox iqtisadi müstəvidə baxacaq.

Yəni, Tramp hakimiyyəti Türkiyə kimi böyük bazarı itirmək istəmir. Üstəlik, regional konfliktlərin həllində də Ankaranın çözüm nöqtəsi olduğunu indi daha yaxşı anlayır.

Bu da o deməkdir ki, qlobal güc olaraq ABŞ özü vəsait xərcləmədən müttəfiqlərinin əli ilə Yaxın Şərqdə və digər bölgələrdə söz sahibliyini qoruyacaq.

Əslində bu qardaş ölkə Türkiyənin də maraqlarına uyğundur. Türkiyə regionun İransız və Rusiyasız oyun qurucusu kimi böyük şahmat taxtasının "ağlarla" oynayan tərəfi kimi boy göstərəcək.

Ankara indi Yaxın Şərqdəki proseslərin tam mərkəzindədir.

Hətta güman etmək olar ki, Rusiya və Ukrayna arasındakı savaşın "xoşbəxt sonluq müstəvisi"ndə irəliləməsi üçün Donald Tramp türkiyəli həmkarı Rəcəb Tayyib Ərdoğanın nüfuzundan yararlanmağa çalışacaq. Çünki Ərdoğanın həm Zelenski, həm də Putinlə normal münasibətləri mövcuddur.

İndi Vaşinqton Ankaranın bir sıra istəklərinə göz yummağa məcburdur. Təbii ki, bu məsələdə Birləşmiş Ştatların NATO konteksində Türkiyə ilə bağlı uzunmüddətli hədəfləri də əsas rol oynayır.

Yaxın gələcəkdə Vaşinqton Balkanlardakı Serbiya məsələsini də Türkiyənin - bu coğrafiyanın əski sahiblərinin əli ilə çözməyə çalışacaq.

Onews.az-ın Siyasət Şöbəsi