Düşünürəm ki, hadisələrin indiki gedişatı ABŞ-da prezidentliyə namizədlər arasında Kamala Harrisin Trampdan daha populyar olduğunu göstərir. Amma hər an hər şey dəyişə bilər və Donald Trampın dörd illik fasilədən sonra yenidən hakimiyyətə gəlməsi mümkündür.

Donald Trampın hakimiyyətə gəlməsi Ukraynada müəyyən narahatlıqlar da formalaşdırmaqdadır. Kiyevdə düşünürlər ki, Tramp hakimiyyətə gəlsə, ilk işi Rusiya ilə münasibətləri normallaşdırmaq olacaq. Bu da ABŞ-ın və Qərbin dəstəyinin Ukraynadan kəsilməsi anlamına gələcək.

Hətta Tramp Kiyev administrasiyasını məcbur edə bilər ki, Zelenski indiki şərtlər daxilində Rusiya ilə danışıqlar masasına otursun. Bu isə Ukrayna üçün ən arzuolunmaz nəticədir. Hətta 2014-cü il vəziyyətindən üçqat, dördqat fəlakətli nəticə deməkdir.

Sözsüz ki, Kiyev indiki vəziyyətlə barışmayacaq. Amma müharibənin Qərbin yardımı olmadan uzanması isə Ukraynanın daha çox ərazi itirməsi deməkdir. Görünən odur ki, Tramp administrasiyası hakimiyyətə gələcəyi təqdirdə Rusiya ilə atəşkəs razılaşması əldə etməyə çalışacaq. Bu da Rusiya-Ukrayna savaşını dondurulmuş münaqişə fazasına keçirəcək.

Belə olan halda növbəti müharibə üçün həm Kiyev, həm də Moskva “time-out” götürəcək. Donald Trampın hakimiyyətə gəlməsi hətta Kiyev üçün daha bir fəlakətli ssenarinin başlanğıcı ola bilər. Bu da Ukrayna ərazilərinin iki yerə bölünməsi deməkdir.

Qərb sahili Avropanın, Şərq sahili isə Rusiyanın nəzarətinə keçə bilər. İstənilən halda bütün variantlar Volodimir Zelenski hakimiyyətinin siyasi intiharı demək olacaq. Qərb Ukraynanı Rusiyaya qarşı müharibəyə sürükləməklə istədiyinə nail oldu.

Ukrayna plazdarma çevrildi, eyni zamanda, Rusiyanın hərbi-siyasi immuniteti və nəbzi yoxlanıldı.

Qərb heç nəyə nail ola bilmədi, ona görə də bu savaşı daha çox uzatmağı düşünmür. Fəlakətin qurbanı isə səriştəsiz Zelenski hakimiyyəti və zavallı ukraynalılar oldu.

Sona Əliyeva
V çağırış Milli Məclisin deputatı