"Düşünürəm ki, Donald Tramp administrasiyası uyğun vaxtda Azərbaycana yeni səfir göndərəcək. Yeni səfir təyinetmə prosesi Birləşmiş Ştatlarda bir az vaxt alan prosesdir".

Bunu Onews.az-a açıqlamasında keçmiş deputat, siyasi şərhçi Sona Əliyeva deyib.

Keçmiş millət vəkilinin fikrincə, ən azından, yeni səfirin seçimi, onun uyğun olub-olmaması barədə müzakirələr, səsvermə prosesi azı bir neçə müddət vaxt alır:

"Hesab edirəm ki, ən geci altı ay ərzində Tramp administrasiyası Bakıya yeni səfir təyin edəcək. Bu məsələdə erməni lobbisinin təsir imkanlarına ABŞ-ın yeni prezidenti imkan verməyəcək. Fikrimcə, Azərbaycan dövləti ilə əməkdaşlıq ABŞ-ın Cənubi Qafqaz siyasətinin əsas prioritetlərindəndir. Vaşinqtondakı yeni siyasi elita Bakı ilə meqa layihələr işləmək əzmindədir. Eyni zamanda, təhlükəsizlik sahəsində də əməkdaşlığımız yeni mərhələyə qədəm qoymalıdır. Bu, zamanın tələbidir. Bütün bu işlər səfir olmadan çox ləng gerçəkləşə bilər. Düşünürəm ki, Baydendən fərqli olaraq Tramp hakimiyyəti Azərbaycanla əməkdaşlığa xüsusi önəm verəcək. Çünki Birləşmiş Ştatlarının yeni rəhbərliyi bütün dividentləri iqtisadi müstəvidə gözdən keçirir. Bu baxımdan, erməni lobbisi Azərbaycana hər hansı təsir göstərə bilməyəcək. ABŞ Orta Asiya ilə bağlı yeni siyasətini də məhz Azərbaycan üzərindən qurmağı düşünür".

Banu Murad