İranın Ermənistandakı səfiri Mehdi Sübhaninin Azərbaycana və xalqımıza qarşı patoloji nifrəti mövcuddur.

Bu patoloji nifrətin kökü isə 25 il əvvələ dayanır. Həmin vaxt Mehdi Sübhani İranın Azərbaycandakı səfirliyinin sözçüsü idi. 2000-ci ildə Azərbaycandan İrana səfər edən media nümayəndələrini müşaiyət edirdi.

Həmin vaxt bizim jurnalistlər Mehdi Sübhanidən xahiş edirlər ki, Tehrandan sonra Təbrizə də getmələri üçün şərait yaratsınlar. Mehdi Sübhani isə "onsuz da Təbriz sizin olacaq, o zaman gedərsiniz" - açıqlamasını ağzından qaçırır.

Azərbaycanlı jurnalistlər bu dialoqu mediamızda işıqlandırdıqdan sonra Mehdi Sübhani təcili Tehrana çağırılır. Ona ciddi iradlar bildirilir. Vəzifədə sürətli yüksəlişi ləngiyir. Bir sözlə, bu hadisə onun üçün əsl siyasi başağrısına çevrilir. Ettalat-ın qaranlıq otaqlarında dindirilir. Ona görə də Mehdi Sübhani bu hadisədən sonra Azərbaycandan və xalqımızdan qisas almağa çalışır. Ermənistan səfirliyi dönəmində özünü yeni hökumətə "şirin" göstərməyə çalışır.

Eyni zamanda, Mehdi Sübhaninin erməni lobbisi ilə sıx işbirliyində olduğu bildirilir. Hətta Fransanın Marsel şəhərində Sübhaninin gizli biznesinə də erməni lobbisinin şərait yaratdığı vurğulanır. İndi Ermənistandakı İran səfiri həm də bu cür sərsəm açıqlamalar verərək özünün maliyyə donorlarının borcundan çıxmağa çalışır. Üstəlik, burada Ettalat və SEPAH amili də var.

Sübhaninin onlardan tapşırıq alaraq bu cür absurd bəyanatlar verməsi də istisna deyil. Tehran hökuməti Azərbaycanın zəhmindən çəkinərək özünü məhəllə respublikası kimi aparır və hansısa kiçik bir ölkədəki səfirinin dili və bu cür sərsəm açıqlamaları ilə İranın rəsmi mövqeyini dilə gətirir. Bu, yüz illik dövlətçilik tarixi olan İran üçün olduqca məntiqsiz yanaşmadır. Üstəlik, Tehrandakı hökumətə yaraşmayan addımdır. Mehdi Sübhani o zaman İrəvandan geri çağrıla bilər ki, Azərbaycan Respublikası öz diplomatik təzyiqlərini daha da artırsın və Tehrandakı molla rejiminə hər hansı çıxış yolu qoymasın.

Qərbi Azərbaycan anlayışı sözün bütün mənalarında İrana yox, məhz Azərbaycana aiddir. İran başa düşür ki, artıq Güney Azərbaycan türkləri ayağa qalxır, ayılır. Ona görə də içərisindəki dövlətçilik xofunu məhz bu cür sərsəm və anlaşılmayan bəyanatlarla üzə çıxarır.

Sona Əliyeva
V çağırış Milli Məclisin deputatı
Onews.az