Rusiya Ermənistanla Azərbaycan arasındakı böyük sülh sazişinin imzalanmasından narahat idi. 8 avqustda Vaşinqtonda imzalanan sazişin yalnız paraflanma sənədi olduğunu gördükdən sonra Kremlin məsələyə və baş tutan görüşə münasibəti dəyişdi.

Moskva indiki məqamda doğrudan da Zəngəzur dəhlizinin açılmasını səmimi şəkildə istəyir. Çünki şimal qonşumuz Qərbin iqtisadi sanksiya dalğaları altında boğulur. Kreml rəsmiləri bu baxımdan, Zəngəzur dəhlizinə alternativ kimi baxırlar. Overçuk da "Ermənistan bizim strateji müttəfiqimizdir" ifadəsini boş yerə işlətmir.

"Putinin dili" adlandırılan keçmiş KQB zabiti bununla onu demək istəyir ki, Zəngəzur dəhlizi Rusiyanın da maraqlarına cavab verəcək. Yəni sanksiyalar altındakı Rusiya öz məhsullarını Ermənistan üzərindən, erməni brendi kimi xarici bazara çıxara biləcək. Görünür, Alyaskada prezident Trampla həmkarı Putin bu məsələdə də razılığa gəlib. Ona görə də Moskva Güney Qafqazla bağlı məsələlərə ilıq münasibət sərgiləyir. Birmənalı olaraq Zəngəzur dəhlizi açılacaq.

Azərbaycan tərəfi öz üzərinə düşəni vaxtından əvvəl edib. İndi növbə Ermənistandadır. Zəngəzur dəhlizi artıq Güney Qafqaza aid məsələ deyil. Qlobal layihədir və bu layihənin Britaniya, Çin kimi donorları var.

Yəni, Rusiya qlobal gücləri qarşısına ala bilməz. Ukrayna cəbhəsini nizama salmadan Kreml susmağa məhkumdur. Bu dəhliz nəinki Azərbaycana, eləcə də Ermənistanın özünə iqtisadi və geostrateji dividendlər gətirəcək.

Sona Əliyeva
V çağırış Milli Məclisin deputatı
Onews.az