"Gürcüstanda bu gecə baş verən hadisələrdə Qərbin, xüsusən də ABŞ və Fransa səfirliyinin birbaşa əli var. Qərb hazırkı Rusiyameyilli hakimiyyəti ilkin mərhələdə laxlatmaq, mövcud boşluqları taparaq növbəti mərhələdə onu yıxmaq istəyəcək".

Bunu Onews.az-a açıqlamasında siyasi şərhçi Tural Turan deyib.

Ekspert düşünür ki, hazırda hökumət qüvvələri ilə müxalif düşərgə arasındakı toqquşmalar lokal xarakterlidir, amma bu hər an alovlana biləcək genişmiqyaslı "yanğınların" qığılcım fazasını xatırladan hərəkətlənmələrdir:

"Tbilisidəki son hadisələrin görüntülərindən aydın olur ki, iğtişaşçılar və ya etirazçılar bu dəfə daha dağıdıcı qüvvələrdən təşkil olunub. Əvvəlki aksiyalarda daha çox tələbə və universitet müəllimləri qollarını çırmalamışdılar. Buna baxmayaraq,onlar heç nə edə bilmədilər. İndiki radikal qruplar da Avropaya inteqrasiyanı mövcud hakimiyyətdən tələb edənlərdir. Onlar da keçmiş dövlət başçısı Mixael Saakaşvilinin həbsdən azad edilməsini və onun yenidən prezident postuna gətirilməsini istəyənlərdir. Fərq ondadır ki, Qərb kəşfiyyatı bu dəfə öz işini "ehtiyatlı" görüb. Radikal qruplar əsasən işsiz və hakimiyyətdən kəskin narazı kəsimlərdən təşkil edilib. Qərb Bidzina İvanişvilinin Gürcüstanın siyasi elitasındakı ipini birdəfəlik kəsmək istəyir. Kreml Qərbin Gürcüstandakı son gedişlərinə daha sarsıdıcı zərbə vura bilər. Hətta gərginlik Abxaziya və Güney Osetiyanın Rusiyaya birləşdirilməsinə qədər gedib çıxa bilər. Bu da Moskvanın bu oyundan ikiqat qazancla çıxması anlamına gələcək. Həm ərazisini böyüdəcək, həm də gürcülərin Avropaya inamını birdəfəlik öldürəcək".

Banu Murad