YAP Nərimanov rayon təşkilatının fəal gənci
Qədirova Şəfiqə

Azərbaycan Respublikası ilə Türkmənistan arasında münasibətlər ortaq tarixə, mədəni dəyərlərə, dil və din yaxınlığına, eləcə də qarşılıqlı hörmət və etimada əsaslanır. Son illər iki qardaş ölkə arasında siyasi dialoq daha da intensivləşmiş, iqtisadi, enerji, nəqliyyat, humanitar və digər sahələrdə əməkdaşlıq yeni mərhələyə qədəm qoymuşdur. Türkmənistan Prezidenti Sərdar Berdiməhəmmədovun 2026-cı il iyunun 22-də Azərbaycana rəsmi səfəri də bu əlaqələrin inkişafında mühüm əhəmiyyət daşıyan hadisələrdən biridir.
Rəsmi səfər çərçivəsində Azərbaycan və Türkmənistan arasında müxtəlif sahələri əhatə edən sənədlər imzalanmışdır. Bu sənədlər siyasi, iqtisadi, nəqliyyat, logistika, humanitar və digər istiqamətlərdə əməkdaşlığın daha da möhkəmləndirilməsinə xidmət edir. Dövlət başçılarının keçirdiyi görüşlər zamanı qarşılıqlı maraq doğuran məsələlər ətrafında geniş fikir mübadiləsi aparılmış, gələcək əməkdaşlığın perspektivləri müzakirə edilmişdir.
Prezident İlham Əliyev Qarabağ və Şərqi Zəngəzurda həyata keçirilən bərpa-quruculuq işlərinə göstərilən dəstəyə görə Türkmənistana təşəkkürünü ifadə etmişdir. Xankəndidə məktəbin inşasına verilən dəstək qardaşlıq münasibətlərinin və qarşılıqlı etimadın növbəti nümunəsi kimi yüksək qiymətləndirilmişdir.
Türkmənistan Prezidentinin Azərbaycana rəsmi səfəri iki ölkə arasında dostluq, qardaşlıq və strateji tərəfdaşlıq münasibətlərinin daha da möhkəmləndiyini nümayiş etdirdi. Keçirilən görüşlər və əldə olunan razılaşmalar gələcək əməkdaşlığın daha da genişlənəcəyinə əminlik yaradır.
Mən, YAP Nərimanov rayon təşkilatının fəal gənci olaraq hesab edirəm ki, Prezident İlham Əliyevin Türkmənistan Prezidenti Sərdar Berdiməhəmmədovla keçirdiyi görüş Azərbaycan–Türkmənistan münasibətlərinin inkişafında mühüm mərhələdir. Qardaş ölkələr arasında mövcud olan qarşılıqlı hörmət və etimad gələcək əməkdaşlığın daha da möhkəmlənməsinə xidmət edəcək. İnanıram ki, bu cür yüksəksəviyyəli səfərlər regionda sülhün, sabitliyin və davamlı inkişafın təmin olunmasına mühüm töhfələr verəcəkdir.