"Mayın 19-da İran prezidenti İbrahim Rəisinin Azərbaycana, Cəbrayıla səfəri və ölkə başçısı İlham Əliyevin iştirakı ilə Araz çayı üzərində inşa edilmiş “Xudafərin” hidroqovşağının istismara verilməsi, eləcə də “Qız Qalası” hidroqovşağının açılış mərasimi iki dövlət arasındakı əlaqələrin gələcək inkişafı baxımından mühüm hadisədir".

Bunu Onews.az-a açıqlamasında Milli Məclisin keçmiş deputatı, politoloq Sona Əliyeva deyib.

Ekspertin sözlərinə görə, İran-Azərbaycan əlaqələrinin bundan sonrakı inkişafı Tehranın Bakıya qarşı münasibətlərindən asılı olacaq:

"Görünür, Tehranda anlayırlar ki, iki ölkə arasındakı əlaqələrin müsbət dinamikasının alternativi yoxdur. Azərbaycana qarşı oyunlar molla rejiminə heç nə vermədi. Əksinə, İran Azərbaycana qarşı gəlməklə böyük iqtisadi ziyanlar çəkdi. Hər iki ölkənin böyük əməkdaşlıq potensialı var. Azərbaycan hər zaman beynəlxalq müstəvidə bir qonşu kimi İranın maraqlarına zidd addım atmayıb. Əvəzində isə İran bir çox hallarda Azərbaycana qarşı xoşagəlməz münasibətlər bəsləyib. Amma irəliyə baxmaq, iqtisadi münasibətlərin inkişafını düşünmək lazımdır. İran anlamalıdır ki, Azərbaycana düşmən olmaq ona heç nə verməyəcək. Düşünürəm ki, Tehran hökuməti Bakı ilə digər iqtisadi layihələrdə də əməkdaşlıq etmək haqqında düşünəcək. Bizim iqtisadi əlaqələrimizin böyük tarixi mövcuddur. İran dövləti Azərbaycanın iqtisadi imkanlarından qarşılıqlı maraqlar çərçivəsində yararlanmaq haqqında yaxşı-yaxşı düşünməli, üçüncü ölkələrin fitnəsi ilə hərəkət etməməlidir ".

Turan