"İranda hakimiyyətə kimlərin gəlməsindən asılı olmayaraq Tehranın Bakıya münasibəti dəyişməyəcək. Çünki molla rejimində son qərarı prezident yox, ali dini lider verir. Cənub qonşumuzun ali dini lideri isə Ermənistanın baş naziri Nikol Paşinyanla sonuncu görüşündə bildirdi ki, Tehran bundan sonra da İrəvanın yanında qərar tutacaq".

Bunu Onews.az-a açıqlamasında siyasi şərhçi Tural Turan deyib.

Ekspertin sözlərinə görə, İran və Ermənistanı hazırda dərin köklərə malik qaranlıq maraqlar birləşdirir:

"Hər iki ölkə Zəngəzur dəhlizinin açılmasına bu və ya digər formada qarşıdır. Əgər iqtisadi asılılıq olmasa, Ermənistan da bu dəhlizin işləməsinə imkan verməyəcəkdi. Amma başqa çarəsi yoxdur. Düşünürəm ki, iyundakı seçkilərdən sonra da İranın Azərbaycan və Ermənistanla bağlı siyasətində hər hansı dəyişiklik baş verməyəcək. Ona görə ki, İran Azərbaycanın qüdrətli dövlətə çevrilməsini istəmir. Molla rejimi türk dünyasının güclənməsindən çox qorxur. Hətta bunu SEPAH-ın hazırladığı animasiyalardan da duymaq mümkündür. Amma İran artıq Azərbaycan üçün təhlükə saçan faktor deyil. Səbəbi sadədir, Bakı önünə çıxan maneənin üstünə getmir, yanından keçir. İran isə əksini etdiyi üçün bütün qonşuları ilə problem yaşamaqdadır".

Fuad Süleyman