Bakının keçmiş merinin 37 gün əsirlikdə olduğunu bilirdinizmi?

37 gün ərzində rus hərbçilər Bakıda keçmiş paytaxt merinə aşağılayıcı hərəkətlər də edirlər.

Onews.az bir çoxlarının bilmədiyi bu faktı uzun illər sonra yenidən gün üzünə çıxarıb.

Hacıbala Abutalıbov 1999-cu ildə “Bu gün” qəzetinə verdiyi müsahibədə bu barədə geniş danışıb.
Eks-mer deyir ki, onun həbsi 20 yanvar hadisələrindən 5 gün sonraya təsadüf edir.

SİTAT: “Yanvarın 25-i gecə saat 2-də general Aleksandr Lebedin başçılığı ilə böyük bir dəstə evimə daxil oldu”.

Abutalıbov deyir ki, onu əsir götürməyə general özü şəxsən gəlibmiş və ayağında da idman ayaqqabıları var imiş...

SİTAT: “Onlar əsgər deyildilər, ən balacasının boyu 1 metr 90 santimetr idi...”
Silahlı ruslar əvvəlcə Abutalıbovun evini alt-üst edirlər.
Sonra onu BTR-ə mindirərək Nəsimi Rayon Hərbi Komendantlığına gətirirlər.

O zaman sadə elmi işçi olan Abutalıbovu 3 saat ərzində dindirirlər.

SİTAT: “3 saat ərzində üzümə avtomatlar tuşlanmışdı və o vəziyyətdə sorğu-sual edirdilər”.

Sonra Fizika İnstitutunun əməkdaşı olan Abutalıbovu general Lebedin öz otağına aparırlar.


Dediyinə görə, binanın ətrafında atışma səsləri eşidilirmiş.

SİTAT: “Hətta Lebedin otağında məni küncə qoydular”.

Abutalıbovu “yanvar qırğınlarında iştirak etməkdə” günahlandırırlar.


Lebedlə görüşdə məlum olur ki, keçmiş meri öz ətrafı satıb.

SİTAT: “Lebed mənə dedi ki, sən müstəqillik istəyirsən, bunu isə bizə sənin yaxınındakılar çatdırıb”.

“Ayaqüstü məhkəmə” təşkil edilir və Hacıbala Abutalıbova 37 gün iş kəsilir.
Amma bu müddət ərzində o, möhkəm xəstələndiyini söyləyir.
Dediyinə görə, xəstəxanaya buraxılmır və təxminən 1 ay tibb məntəqəsində müalicə alır.


SİTAT: “Həmin 1 ay 7 gün ərzində rus əsgərlərinin avtomatı başımın üzərindən əskik olmadı”.

Abutalıbov həbsdən çıxandan 3 gün sonra Sankt-Peterburqa getdiyini və elmi araşdırmalarla məşğul olduğunu bildirir.
O, 2001-2018-ci illərdə Bakının meri, daha sonra Baş nazirin müavini postlarını tutub.

Turan