Onews.az şair Aydan Ayın Azərbaycanın Milli Qəhrəmanı Hökumə Əliyevaya həsr etdiyi şeiri təqdim edir:

***
(Hökümə Əliyevanın əziz xatirəsinə)

... səsin göyün üzündə buludlarla qonşudu,
səsin göyün üzündə ulduzlarla qonşudu,
səsin nağıllarda göydən düşən almadı,
səsin simurq quşudu!

Daha qar yox, göydən sənin səsin yağacaq,
çıxacaq tamaşana yerdə şehli çiçəklər...
Sən inandırdın bizi – hər şey yaxşı olacaq,
sən inandırdın bizi gedənlər gələcəklər...

Səsində bir uşağın gözünün yaşı axır,
səsində pəncərədən bir ana sənə baxır,
səsində ay batmayıb, hələ ulduzlar axır,
göy üzündə saçını mələklər hörəcəklər...

Daha sənin səsində ağaracaq dan yeri,
daha sənin səsində günəş qürub edəcək...
Daha göyün üzünə olmayacaq “göy” deyən,
Hökümənin üzüdü, bizə baxır...– deyəcək.

Aydan Ay