2025-ci ilin iyun-iyul aylarında icrası nəzərdə tutulan “Ailənin Dəyər Daşıyıcısı” layihəsinin ilkin hazırlıq mərhələsi uğurla başa çatıb.

Onews.az-ın verdiyi xəbərə görə, layihənin məqsədi ailə dəyərlərinin təbliği, qadının ailə institutundakı rolunun gücləndirilməsi və sağlam ailə münasibətlərinin təşviqinə yönəlmiş maarifləndirmə işlərini həyata keçirməkdir.
Hazırlıq mərhələsi çərçivəsində layihə komandası ilə geniş görüş keçirilib. Eyni zamanda, layihənin məqsədləri, fəaliyyət planı, komanda üzvlərinin məsuliyyət bölgüsü və icra strategiyası müzakirə olunub.

Görüş interaktiv müzakirə formatında təşkil edilib.

Bundan başqa, komandadaxili əməkdaşlığın gücləndirilməsinə xüsusi diqqət yetirilib.
Layihənin ikinci mərhələsində 7 tematik maarifləndirmə tədbirini əhatə edən proqram hazırlanıb.

Tədbirlər ailə institutunun möhkəmləndirilməsi, qadının sosial və psixoloji inkişafı, sağlam münasibətlərin qurulması və ailədaxili funksiyaların balanslaşdırılması mövzularını əhatə edəcək.

Proqram çərçivəsində hazırlanmış maarifləndirici kitabçada qadının şəxsiyyətinin formalaşması, analıq rolu kimi məsələlərə diqqət çəkilib.
Həmçinin ailədaxili münasibətlər, stressin idarə olunması, partnyor dəstəyi və valideynlikdə gender aspektləri kimi məsələlər geniş şəkildə müzakirə edilib.

Kitabça elmi əsaslara söykənən, eyni zamanda gündəlik həyata tətbiq oluna bilən praktik məsləhətlər və real nümunələrlə zənginləşdirilib.
Layihənin icra mərhələsinə keçid üçün bütün texniki və təşkilati hazırlıqlar başa çatıb.
İyul ayının sonunadək keçiriləcək tədbirlərin monitorinqi aparılacaq, nəticələr sənədləşdiriləcək və yekunda ailə dəyərlərinin təşviqinə yönəlik yeni təşəbbüslər üzrə təkliflər hazırlanacaq.

Fuad